Cristina Ximenes sai primeiru lugar iha kompetisaun hakerek kriativu

DILI, 28 Agostu 2026 (TATOLI)—Jornalista husi jornál INDEPENDENTE, Cristina Ximenes, sai primeiru lugar iha Kompetisaun Hakerek Kriativu ne’ebé Ajénsia Notisioza Timor-Leste TATOLI, I.P. organiza hodi komemora aniversáriu TATOLI, I.P. nian ba da-10 ho tema “Inovasaun, Krebilidade no Transformasaun Dijitál”.

Atividade ne’e organiza ho objetivu mak atu fó espasu ba jornalista sira hodi dezenvolve no hatudu kapasidade hakerek kriativu, kreatividade no kualidade produtu jornalístiku.

Jornalista INDEPENDTE ne’ebé kompete ho obra “Luta Inan Ida ba Oan Na’in Tolu iha Dader Nakukun Nia leet” ne’e sente kontente tebes tanba bele sai manán-na’in iha kompetisaun hakerek kriativu ne’e.

“Ha’u sente kontente. Obra ne’ebé ha’u hakerek ne’e tanba motiva husi situasaun reál ne’ebé inan ida hasoru ho nia oan sira iha moris loro-loron nian. Istória ne’ebé ha’u hakerek ne’e bazeia ba faktu reál ne’ebé ha’u observa iha terrenu,” Cristina Ximenes hateten ba Agência TATOLI hafoin entrega prémiu iha serimónia diálogu ho topiku “Hametin Nasionalizmu no Patriotizmu hodi Dezenvolve Timor-Leste” ne’ebé Agência TATOLI organiza hodi selebra loron konsulta popular ba da-27, iha iha Faról, ohin.

Nia hatutan, istória ne’ebé nia hakerek ne’e tanba hetan informasaun husi ninia viziñu balun ne’ebé husu ninia posibilidade atu halo entrevista ba inan refere ninia istória moris iha sosiedade nia leet.

“Tanba ne’e mak ha’u mós ba halo entrevista ha’u-nia fonte ne’e no ha’u haree nia loro-loron ba servisu sempre kele nia oan feto. Situasaun ne’e akontese tanba nia (inan) ne’e ho ninia parseiru (la’en) iha problema, entaun abandona tiha nia ho ninia oan. Tanba ne’e, ne’e nia deside hakarak fila ba ninia rai orijen Manatutu Natarbora,” nia esplika.

Husi istória ne’ebé nia hakarek, nia dehan, iha mós transformasaun ba ema-nia moris tanba liuhusi notísia ne’ebé nia hakerek hetan kedas apoia husi Gabinete Prezidente Repúblika hodi fó asisténsia umanitária no realoka fali nia (inan) ho nia oan sira ba sira-nia hela fatin orijen (Manatutu).

“Entaun, ida-ne’e mak fó korajen mai ha’u atu kontinua hakerek obra kriativu sira hodi inspira sosiedade no nia sei kontinua kompete iha kompetisaun sira hanesan ne’e,” nia dehan.

Entretantu, jornalista husi Dili Post, Azacsi G. Quintão, okupa segundu lugar ho obra “Husik Kadeira Eskola Tanba Alin Sira, Luta iha Dili ho Motor” no Jornalista husi Loluwari Cesar Pires okupa terseiru lugar ho obra “Sofrimentu no Esperansa iha kadunan Mauhoka”.

Prosesu Avaliasaun

Avaliasaun ba produtu jornalístiku ne’e hala’o husi ekipa júri ne’ebé kompostu husi ema na’in-tolu mak hanesan Maria Auxiliadora F. Ximenes, Xisto Freitas da Piedade no Cancio Ximenes Soares. Júri sira analiza no fó valór ba hakerek sira ne’ebé hatama husi konkorrente sira, bazeia ba kualidade no aspetu jornalístiku ne’ebé determina ona husi komisaun organizadora.

Bazeia ba rezultadu avaliasaun ne’e, Cristina Ximenes husi Jornal Independente hetan Primeiru Lugar ho valór 86, Azacsi G. Quintão husi Dili Post nu’udar Segundu Lugar ho valór 63, no Cesar Pires husi Loluwari okupa Terseiru Lugar ho valór 60.

Avaliasaun ne’e hala’o bazeia ba kritéria husi kompetisaun hakarek kriativu ne’ebé haree liu ba
téknika arasaun deskrisaun kreatividade, orijinalidade no ángulu, no rigor jornalístiku.

Obra ne’ebé jornalista sira hakerek sei foku (angulu) liubá, dezenvolvimentu komunidade rurál ne’ebé iha impaktu husi notísia no perfil umanu, erói (Feto, foin-sa’e, inkluzaun) ne’ebé halo mudansa ba sosiedade.

Jornalista : Alexandra da Costa

Editora      : Julia Chatarina