Edukasaun Munisipál sei hato’o pedidu aumentu PME iha Baukau
BAUKAU, 28 Agostu 2026 (TATOLI)—Serbisu Munisipál Edukasaun (SME) Baukau planeia sei hato’o pedidu karta justifikasaun ba Ministériu Finansa (MF) relasiona ho aumentu períodu Programa Merenda Eskolár (PME) ba tinan-ne’e.
Diretór Serbisu Munisípal Edukasaun Baukau, Afonso dos Santos da Costa, esplika bazeia ba programa tinan-ne’e prosesu implementasaun PME aprova ba períodu tolu, maibé tuir planu SME Baukau sei aumenta tan períodu ida nune’e to’o ohin loron Programa Merenda Eskolár seidauk bele kontinua implementa.
“Tuir Lei Finansa, Baukau liu ona pursentu períodu implementasaun nian. Entaun, ita tenke justifika fali ba finansa ho karta ida liuhusi munisípiu ba Ministériu Finansa, atu klarifika katak loos ona mak ita foin implementa. Tuir lei tinan-ida implementa períodu tolu maibé agora ita-nia implementasaun ba fali períodu haat,” Afonso dos Santos dehan iha Vila Antiga, Baukau, Sesta ne’e.
Nia relata maioria eskola sira-ne’ebé sai benefisiáriu hetan ona alokasaun orsamentu maibé sei hela eskola 16 nune’e presiza hato’o karta justifikasaun antes kompleta orsamentu hodi kontinua implementa ba períodu ikus.
“Ba eskola 16 ne’ebé seidauk hetan orsamentu, ami nafatin esforsu no tenta atu implementa lalais,” Afonso tenik.
Entretantu, implementasaun Programa Merenda Eskolár iha Munisípiu Baukau ho valór orsamentu $2.788.690 fó benefisiu ba estudante 34.614 husi eskola sira kompostu husi Pré-Eskolár, Ensinu Báziku Primeiru, Segundu no Terseiru Síklu sira iha-ne’ebé implementa hamutuk loron efetivu 150 no foin ezekuta loron efetivu 70.
Jornalista: Natalino Belo
Editór: Xisto Freitas da Piedade
