Empreza konstrui ona postu saúde foun lima iha Kovalima
KOVALIMA, 28 Agostu 2026 (TATOLI) – Diretór Interinu Servisu Saúde Munisípiu Kovalima, Teofilho Amaral, informa katak Autoridade Munisípiu Kovalima liuhusi Servisu Saúde Munisípiu no Programa Dezenvolvimentu Integradu Munisípiu (PDIM) 2026, kontrata ona empreza hala’o hela konstrusaun postu saúde foun hamutuk lima.
“Konstrusaun infraestrutura saúde foun sira ne’e la’ós de’it atu harii edifísiu ba prestasaun servisu saúde, maibé inklui mós rezidénsia ba pesoál saúde tanba importante atu fasilita profisionál saúde sira hela besik fatin servisu, nune’e bele fó atendimentu ho lalais, liuliu bainhira komunidade hasoru situasaun emerjénsia,” dehan ba Jornalista sira iha kna’ar fatin-Kovalima.
Tinan ida ne’e, Autoridade Munisípiu Kovalima liuhosi Servisu Saúde Munisípiu ho Programa Dezenvolvimentu Integradu Munisípiu (PDIM) konstrui Postu Saúde lima mak Postu Saúde Fatu-Loro, Casabauk, Suai-Loro, Matai no Usucai, ne’ebé pakote ho rezidénsia ba pesoál saúde sira.
Tuir planu estratéjiku Servisu Saúde Munisípiu Kovalima, kada suku iha territóriu munisípiu tenke iha estabelesimentu saúde ida, atu komunidade bele asesu ho fasil ba servisu saúde primária.
“Ita iha Servisu Saúde Munisípiu Kovalima tuir planu estratéjiku setór saúde nian katak kada suku ida tenke iha estabelesimentu saúde ida. Agora iha Kovalima ita konklui ona suku 30 no estabelese ona servisu saúde iha suku sira. Foin lalais hela suku rua, Casabauk no Usucai, maibé ita agradese tanba iha tinan ida ne’e tama ona iha projetu PDIM no konstrusaun sei lao hela,” nia hatutan.
Konstrusaun Postu Saúde foun lima ne’e, ne’ebé pakote ho rezidénsia ba pesoál saúde, uza orsamentu husi Programa Dezenvolvimentu Integradu Munisípiu (PDIM) 2026 hamutuk $1,687,547.00.
Husi montante orsamentu ne’e, $ 348,579.78 aloka ba konstrusaun Postu Saúde Fatu-Loro, $307,070.33 ba Postu Saúde Casabauk, $308,025.59 ba Postu Saúde Suai-Loro, $319,281.54 ba Postu Saúde Matai no $404,592.05 ba Postu Saúde Usecai.
Iha sorin seluk, Xefe Sentru Saúde Postu Administrativu Fatululik, Alberto Noronha, reforsa katak komunidade Aldeia Fatu-Loro suporta konstrusaun Postu Saúde foun liuhosi entrega rai ho gratuitamente ba konstrusaun infraestrutura saúde ne’e.
“Liga ho konstrusaun Postu Saúde foun iha Aldeia Fatu-Loro ne’e, ami nia komunidade entrega rai ho gratuita ho medida naton. Nune’e, dadaun ne’e konstrusaun hala’o hela tanba empreza sira hahú mobiliza ona materiál konstrusaun,” Alberto Noronha hateten.
Nia apresia inisiativa komunidade ne’ebé fó apoiu ba konstrusaun infraestrutura saúde, tanba infraestrutura ne’e sei fó benefísiu diretamente ba komunidade, liuliu atu asesu ba servisu saúde primária.
Relembra katak, iha loron 13 Agostu 2026, Sekretáriu Estadu Dezenvolvimentu Lokál Mateus dos Santos Talo hamutuk ho Autoridade Munisípiu Kovalima hala’o monitorizasaun implementasaun projetu Planu Dezenvolvimentu Integradu Munisípiu (PDIM).
Atividade Monitorizasaun ne’e ho objetivu atu haree diretamente progresu implementasaun projetu, liuliu kualidade obra, kumprimentu padraun tékniku no efisiénsia iha utilizasaun rekursu públiku.
Jornalista: Celestina Teles
Editór: Florencio Miranda Ximenes
