Governu promove produtu Timor-Leste iha Simpóziu OceanX

DILI, 28 Agostu 2026 (TATOLI)-Iha Simpóziu OceanX Timor-Leste ho tema “Siénsia ba Futuru Azúl”, Governu mós promove identidade kulturál Timor-Leste lihuhusi feira loron ida.

Feira ne’e iha stand 15 ne’ebé Governu konvida grupu oioin aprezenta sira-nia produtu hanesan soru-tais, promosaun tais, artezanatu, kafé no seluk tan.

Jordania Sarmento husi grupu Bobometu hatete partisipa feira ne’e tanba hetan konvite husi Ministériu Komérsiu no Indústria, no Ministériu Turizmu no Ambiente atu halo promosaun ba sira-nia produtu ne’ebé sira prodús.

“Ami tuir feira loron ida atu halo promosaun ba produtu ne’ebé ami halo hanesan soru-tais, promosaun tais feto, belak mane no seluk tan. Produtu ne’ebé ami tau ne’e halo promosaun de’it, maibé karik ema balun hakarak sosa bele no balun hakarak enkomenda ami bele halo”, Jordania Sarmento hatete ba Tatoli, iha Sentru Konvensaun Dili, ohin.

Tuir nia, sasán ne’ebé sira halo promosaun ne’e nia folin hahú husi $1 to’o $65. Dadersán to’o agora seidauk hetan rendimentu, tanba sasán ne’ebé tau ne’e halo promosaun de’it.

Na’in ba Kafé Kuda Ulun, Loriku Marobo, agradese ba Governu tanba bele envolve sira iha feira sira tantu nasionál komu internasionál.

“Iha ne’e ami fa’an ka halo promosaun kafé ho naran Kafé kuda Ulun. Kafé ne’e ami foku liu ba ami-nia produtu husi postu Lolotoe, munisípiu Bobonaru, ne’ebé foku ba kafé arábika”, Loriku dehan.

Kafé ne’ebé sira halo promosaun ne’e ba expresso folin $1 no maciato $1.50. “Ami-nia rekomendasaun nafatin envolve ami iha atividade sira ne’e iha future, nune’e ita bele promove di’ak liután ita-nia produtu ba mundu”, dehan.

Jornalista: Arminda Fonseca 

Editora: Maria Auxiliadora