Gráfiku asidente tráfegu iha Bobonaru tun iha fulan tolu ikus
BOBONARU, 28 Agostu 2026 (TATOLI) – Seksaun Tránzitu Seguransa Rodoviária, Komandu Polísia Munisípiu Bobonaru rejista gráfiku asidente tráfegu iha fulan tolu ikus ne’e tun, tanba komunidade no utente rodoviária hahú ona iha disiplina ba utilizasaun estrada no sinál tránzitu.
Seksaun Tránzitu no Seguransa Rodoviária Munisípiu Bobonaru kontinua hala’o operasaun auto-stop ho objetivu atu fó edukasaun sívika no hasa’e disiplina ba utilizadór veíkulu sira iha via públika, ne’ebé kontribui ona ba redusaun kazu asidente no infrasaun tránzitu iha munisípiu ne’e.
Komandante Seksaun Tránzitu no Seguransa Rodoviária Komandu Polísia Munisípiu Bobonaru, Inspetór Asistente João Belo, hatete rezultadu husi operasaun Auto-Stop no atividade edukasaun públika ne’ebé hala’o hamutuk ho meiu komunikasaun sosiál hahú fó impaktu pozitivu, ne’ebé hatudu husi redusaun kazu asidente no infrasaun iha fulan hirak ikus ne’e.
Komandante ne’e haktuir iha fulan tolu liubá, Seksaun Tránzitu no Seguransa Rodoviária mós hala’o atividade Talk Show iha Rádio Komunidade Maliana atu fó informasaun no edukasaun ba populasaun, liuliu komunidade sira iha área rurál, kona-ba importánsia atu kumpre regra no disiplina tráfiku.
Notísia relevante: PNTL Bobonaru rejista asidente tráfegu 42 inklui na’in-tolu lakon vida
“Agora populasaun hahú ona disiplina, tanba ne’e ita bele dehan durante fulan tolu ikus ne’e, ita haree katak gráfiku kazu asidente no infrasaun tun ona”, nia dehan.
Husi fulan-Janeiru to’o Agostu 2026, Polísia Munisípiu Bobonaru rejista asidente hamutuk 46, ne’ebé rezulta ema na’in-haat mate no asidente sira ne’e hotu entrega ona ba Ministériu Públiku atu kontinua prosesu tuir prosedimentu no lei ne’ebé vigora.
João Belo esplika katak durante operasaun, polísia haree no rejista infrasaun oioin, liuliu sidadaun sira ne’ebé kontra orden autoridade, la uza asesores obrigatóriu, halai ho velosidade aas liu no la tuir sinál tránzitu ne’ebé instala iha estrada.
“Aleinde haree ba disiplina motorista, ita mós verifika sira-nia dokumentu, dalaruma sidadaun balun la fó atensaun ba karta kondusaun no dokumentu veíkulu, ne’ebé moris ka mate. Tanba ne’e, operasaun ida-ne’e importante atu fó hanoin ba utilizadór veíkulu sira katak bainhira uza via públika tenke disiplina no garante katak dokumentu hotu iha kondisaun”, nia hatutan.
Iha periodu janeiru to’o agostu ne’e, PNTL mós konsege halo aprensaun ba motorizada no karreta hamutuk 450, ne’ebé komete infrasaun, ho totál reseita husi multa hamutuk $17.934.
João Belo apela ba utilizadór veíkulu hotu iha munisípiu Bobonaru atu kontinua respeita regra tránzitu, utiliza ekipamentu seguransa no asegura dokumentu veíkulu no karta kondusaun nafatin válidu, atu prevene asidente no garante seguransa ba ema hotu ne’ebé utiliza estrada.
Notísia relevante: DNTT Bobonaru no PNTL husu komunidade aumenta disiplina iha estrada hodi redús asidente
Jornalista: Sergio da Cruz
Editora: Maria Auxiliadora
