Kardeal Virgílio inaugura Kapela São José iha Paiol Has-Laran
DÍLI, 28 Agostu 2026 (TATOLI) – Arsebispu Metropolitanu DÍli, kardeal Virgílio do Carmo da Silva, hamutuk ho padre sira, lideransa Igreja no komunidade sarani, inaugura ofisialmente Kapela São José iha Bairro Paiol Has-Laran, Bekusi, Postu Administrativu Kristu Rei, Munisípiu Dili, Sesta-feira.
Kapela foun ne’e sei sai fatin ba selebrasaun Eukaristia, orasaun no atividade pastorál sira, hodi hametin fé no unidade komunidade sarani iha área ne’e.
Iha nia intervensaun, Cardeal Virgílio hateten katak inaugurasaun kapela ne’e la’ós de’it marka remata konstrusaun edifísiu foun, maibé mós reprezenta dezenvolvimentu espiritual komunidade no kompromisu sarani sira atu moris tuir valór Evanjéliku.
“Kapela ida-ne’e tenke sai uma ba ema hotu-hotu atu hamutuk iha orasaun ba Aman Maromak no nia Oan Mane, Jesus Kristu, hodi promove dame no solidariedade entre maluk sira. Igreja bolu ita atu la’ós de’it hametin parede sira, maibé mós hametin ita-nia fé no relasaun ho Maromak,” dehan Cardeal Virgílio.
Nia hato’o apresiasaun ba komunidade sarani no ema hotu ne’ebé fó kontribuisaun ba konstrusaun kapela ne’e, ne’ebé sai mehi komunidade nian durante tinan balun.
Kardeal Virgílio dehan Kapela São José mós reprezenta ezemplu ba família kristaun sira, tanba São José hatudu obediénsia, servisu no responsabilidade ba Maromak no família.
Tanba ne’e, nia apela ba komunidade atu hala’o moris loron-loron ho espíritu servisu no humildade, tuir ezemplu São José.
Antonio Oliveira de Carvalho, xefe ekipa konstrusaun Kapela São José, hato’o agradeseimentu ba Arquidiosese Dili, padre sira no ema hotu ne’ebé fó apoiu ba realizasaun konstrusaun kapela ne’e.
Nia dehan prezensa Kardeal Virgílio iha serimónia inaugurasaun sai motivasaun ba komunidade atu kontinua partisipa ativu iha vida Igreja.
Nia mós hein katak Kapela São José bele sai sentru ba formasaun espiritual juventude no família sira, no mós ba grupu apostoladu, hodi kontribui ba dezenvolvimentu morál no sosial iha Bairro Paiol Has-Laran.
Serimónia inaugurasaun hahú ho selebrasaun Eukaristia no kontinua ho bénsaun ba edifísiu kapela, ku’a fita no vizita ba instalasaun iha laran kapela.
Sarani barak hosi Parókia Becora no komunidade Paiol Has-Laran partisipa iha serimónia ne’e.
Ho inaugurasaun Kapela São José, komunidade katólika iha Bekusi Paiol Has-Laran agora iha fatin apropriadu ida atu hala’o atividade relijioza no hametin tan fé, unidade no servisu ba komunidade.
Jornalista: Camilio de Sousa
Editór: Filomeno Martins
