MESSK sensibiliza baze legál ensinu superiór iha Baukau
BAUKAU, 28 Agostu 2026 (TATOLI)—Governu liuhusi Ministériu Ensinu Superiór Siénsia no Kultura (MESSK), Sesta ne’e, realiza sensibilizasaun baze legál ligadu ho ensinu superiór iha Munisípiu Baukau.
Diretór Jerál Ensinu Superiór MESSK, Domingos Barros, esplika sensibilizasaun baze legál sira-ne’ebé hato’o ba partisipante hanesan enkuadramentu legál kona-ba ensinu superiór, Lei Báziku Ensinu Superiór no Dekretu-Lei ne’ebé estabelese Institutu Politékniku Timor-Leste.
“Ita tenke hatene lala’ok lei ne’e regulariza ensinu superiór, tanba ne’e presiza atu ita-nia joven sira-ne’ebé ba eskola iha ensinu superiór bele hatene lei nia konteúdu no orientasaun,” Domingos Barros hateten iha Sentru Konvensaun Baukau (CCB-sigla portugeza) Vila Antiga.
Domingos Barros konsidera importante atu entidade sira iha nivel munisípal komprende no hatene informasaun kona-ba Lei Ensinu Superiór ne’ebé aprova iha tinan rua liubá, iha-ne’ebé munisípal sira seidauk iha koñesimentu nune’e presiza halo divulgasaun ba entidade sira iha baze hodi entende.
Aleinde ne’e, vantajen prinsipál husi Lei Báziku Ensinu Superiór mak atu regula no orienta ema hotu atu hala’o atividade ensinu superiór tuir prosedimentu sira-ne’ebé estabelese ona mezmu durante implementasaun hasoru dezafiu liuliu kona-ba uza lian Portugés no Tetun.
“Obrigatorimente tenke tanba iha Konstituisaun artigu 13 hateten ona katak lian rua ne’e lian ofisiál. Ha’u fiar prosesu ne’e pasu pur pasu sei hetan rezultadu di’ak iha futuru,” Domingos Barros akresenta.
MESSK liuhusi Diresaun Jerál Ensinu Superiór no Siénsia iha esperansa katak sensibilizasaun referida bele hatutan matéria to’o iha baze, nune’e komunidade bele komprende konteúdu no orientasaun ne’ebé estabelese ona iha lei Báziku Ensinu Superiór.
Entretantu, partisipa iha atividade divulgasaun ne’e maihusi autoridade munisípal, administrasaun postu, servisu munisipál, estudante ensinu superiór no entidade seluk.
Jornalista: Natalino Belo
Editór: Xisto Freitas da Piedade
