MSSI apoiu materiál konstrusaun uma ba vulnerável ida
VIKEKE, 28 Agostu 2026 (TATOLI)—Diretór Servisu Sentru Solidariedade Sosiál Munisípiu Vikeke, Geraldo de Carvalho, informa Governu liuhusi Ministériu Solidariedade Sosiál no Inkluzaun (MSSI) apoia materiál konstrusun uma nian ba família vulnerável iha Aldeia Uatulesu, Suku Uaimori, Postu Vikeke Vila, Munisípiu Vikeke.
“Ami horisehik apoia ona materiál konstrusaun uma nian hanesan kalén, besi, simente no materiál sira seluk ba ita-nia maluk vulnerável ho naran Justinho da Silva, idade 58, atu konstrui uma ba nia hodi hela iha laran tanba ita-nia maluk ne’e uma laiha, hela de’it iha fatuk okos. Tan ne’e, MSSI foti desizasaun apoia materiál para konstrui uma ida,” Geraldo ba TATOLI iha Postu Vikeke Vila, Sesta ne’e.
Geraldo konta katak durante tinan barak benefisiáriu referidu nia uma laiha no hela de’it iha fatuk okos mak fó mahon ba nia, nune’e iha momentu ne’ebá Ministra Solidariedade Sosiál no Inkluzaun, Verónica das Dores, mak bá vizita direta utente Justinho nia hela fatin hodi observa kondisaun ne’ebé benefisiáriu ne’e enfrenta.
“Tan ne’e, ministra orienta kedas Diresaun Jerál Protesaun Sosiál hodi apoiu asaun sosiál materiál konstrusaun Uma Solidária ba família vulnerável Justinho. Materiál ne’ebé ita oferese ba benefisiáriu ne’e ba konstrusaun uma medida 6mx6m, sei konstrui kuartu rua, koziña (dapur), no hariis-fatin. Aleinde oferese materiál, ita mós apoia orsamentu ba tula rai-henek, fatuk no sosa batako nian hamutuk $1.350,00,” nia aprezenta.
Nune’e, nia dehan, kona-ba servisu konstrusaun autoridade suku, komunidade Uaimori no funsionál Sentru Solidariedade Munisípiu Vikeke mak sei apoiu servisu voluntáriu hodi konstrui uma.
“Ita-nia maluk ne’e família laiha, nia meask de’it. Entaun liuhusi uma ne’ebé ita konstrui bele tulun ona nia hodi hela iha uma laran. Tuir planu, uma referida sei konstrui iha fulan ida-ne’e,” nia tenik.
Iha fatin ketak, Xefe Uaimori, Francelino António Gomes haktuir, MSSI konstrui uma ba abitante Justinho da Silva tanba durante ne’e laiha uma hodi hela iha laran.
“Ha’u sente uma ne’e tulun tebes ba ita-nia benefísiáriu Justinho tanba durante ne’e nia laiha uma dignu ida hodi hela, entaun ho apoia ida-ne’e ita-nia abitante ne’e bele hela iha laran hodi tahan udan no loron,” nia argumenta.
Nia relata uma ne’ebé konstruidu modelu meia parede (setengah tenbok), depoiz didin ho kalén bazeia ba orsamentu ne’ebé ne’ebé MSSI apoia. Kona-ba rai, rai komunidade nian mak fó ba benefisiáriu hodi konstrui uma iha laran.
Entretantu, entregra materiál konstrusaun ne’e, MSSI liuhusi Diresaun Nasionál Aprovizionamentu, Sentru Solidariedade Sosiál no Inkluzaun Munisípiu Vikeke no Unidade Sentru Solidariedade Sosiál no Inkluzaun Postu Administrativu Vikeke Vila direta ba benefisiáriu.
Jornalista: Vitorino Lopes da Costa
Editór: Xisto Freitas da Piedade
