Númeru mate iha Nepál sa’e ba 579, Obriga partidu polítiku sira adota rezolusaun pontu 10
DILI, 29 Agostu 2026 (TATOLI) – Autoridade Nasionál Redusaun no Jestaun Risku Dezastre Nepál nian relata katak mate-isin hamutuk 579 mak hetan ona iha área sira ne’ebé afetadu hosi inundasaun no ema na’in 1.924 mak sei lakon. Ho inundasaun inesperadu ne’e obriga partidu polítiku sira adota ona rezolusaun komún ho pontu 10.
Enkontru ne’e espresa tristeza kle’an ba lakon vida no estragu sira ne’ebé maka relata iha Rasuwa, Nuwakot, Dhading, Gorkha, Chitwan, Nawalparasi no munisípiu sira seluk. Ida-ne’e fó omenajen ba sira ne’ebé mate iha dezastre no hato’o kondolénsia ba sira-nia família ne’ebé lakon.
Partidu polítiku sira mós konkorda katak estadu tenke toma responsabilidade ba tratamentu no atendimentu ba sira ne’ebé hetan kanek iha dezastre ne’e, nune’e mós fó akonsellamentu psikososiál.
Bainhira deskreve dezastre ne’e hanesan teste ida ba unidade nasionál, partidu sira kompromete atu ultrapasa diferensa polítika sira no fó prioridade ba protesaun ba sidadaun sira-nia moris no ba interese nasionál.
Rezolusaun komún ho pontu 10 inklui:
- Depotiza esforsu tulun nian: Partidu polítiku sira sei evita kompetisaun iha operasaun salvamentu no tulun nian no serbisu ho kooperativu. Lider no kuadru partidu sira sei mobiliza de’it nu’udar voluntáriu umanitáriu.
- Sistema odamatan ida ba asisténsia finanseira: Partidu sira no indivíduu sira sei hetan dezenkorajamentu atu halibur doasaun sira ho independente. Kontribuisaun sira sei depozita liuhosi fundu ofisiál governu nian ba ajuda ba dezastre ka konta ida ne’ebé dezignadu hosi governu.
- Uzu responsável ba mídia sosiál: Partidu sira husu ona atu fahe informasaun ne’ebé verifika ona enkuantu evita informasaun ne’ebé laloos, konteúdu ne’ebé ezajeradu no materiál ne’ebé bele viola privasidade no dignidade hosi vítima dezastre sira.
- Estudu sientífiku kona-ba lagoa glasiál sira: Governu sei hala’o kedas estudu sientífiku sira no mapeamentu ba lagoa glasiál sira ho risku aas iha Nepal. Parte sira husu mós esforsu sira hodi estabelese mekanizmu sientífiku no tékniku konjuntu ida ho Xina hodi estuda lagoa glasiál sira ho risku aas iha parte Xina nian no hamenus risku sira ne’ebé asosiadu.
- Diplomasia ba dezastre no sistema alerta antesipada: Nepal no Xina tenke institusionaliza fahe dadus iha tempu-reál no dezenvolve sistema alerta antesipada ne’ebé konfiável, bazeia ba teknolojia, hodi konsidera sistema mota transfronteirisu sira.
- Unidade nasionál no salvamentu inkluzivu: Papél governu lokál sira nian nu’udar respondente dahuluk tenke hametin, enkuantu esforsu salvamentu no tulun nian tenke fó prioridade ba feto sira, labarik sira, idozu sira no ema sira ho defisiénsia.
- Rekonstrusaun reziliente no toleránsia zero: Infraestrutura ne’ebé hetan estragu tenke harii fali tuir padraun seguransa no reziliénsia ne’ebé aas liu. Sira ne’ebé envolve iha marketing negra, falta artifisiál no utilizasaun sala ba fornesimentu tulun nian tenke hasoru asaun legál ne’ebé rigorozu.
- Levanta kestaun kona-ba justisa klimátika: Nepal tenke levanta ho efetivu kestaun kona-ba lakon no estragu ne’ebé kauza hosi klima iha fórum internasionál sira no buka apoiu hosi komunidade internasionál no parseiru dezenvolvimentu sira bazeia ba justisa klimátika.
- Apelu ba asisténsia internasionál: Parte sira husu asisténsia umanitária, téknika no finanseira hosi Nasoins Unidas, parseiru dezenvolvimentu sira, organizasaun naun-governamentál internasionál sira, nasaun belun sira no diáspora nepalés ba salvamentu, tulun, reabilitasaun no rekonstrusaun.
- Formasaun mekanizmu partidu hotu-hotu ho nivel aas: Tenke forma komisaun parlamentár ida atu fornese konsellu, apoiu no fiskalizasaun kontinua ba esforsu sira governu nian relasiona ho rekonstrusaun pós-dezastre, adaptasaun ba klima, redusaun risku dezastre no reforma sira ba polítika dezastre nasionál sira.
Enkontru ne’e mós elojia tebes kontribuisaun sira hosi Ezérsitu Nepal, Polísia Nepal, Forsa Polísia Armada, traballadór saúde sira, funsionáriu públiku sira no voluntáriu sira ne’ebé envolve iha resposta ba dezastre.
Notísia relevante: Númeru ema mate iha Nepál aumenta ba 538
Fonte: Xinhua/Online Khabar
