Venezuela anunsia akordu petrolíferu ho EUA
DILI, 29 Agostu (TATOLI) – Venezuela fó-sai iha loron-sesta ne’e saida maka nia bolu “akordu istóriku ida” ho Governu norte-amerikanu hodi promove investimentu iha rekuperasaun no rekonstrusaun infraestrutura estratéjiku ba nia indústria idrokarbonetu sira.
Iha nota imprensa, prezidente interinu Venezuela nian, Delcy Rodriguez, hatete katak akordu ne’e sei ajuda hametin relasaun bilaterál sira no fasilita fluxu boot ida investimentu nian iha setór enerjétiku nasaun nian.
Akordu sei permite atu Venezuela aumenta maka’as produsaun petróleu nian ho partisipasaun hosi operadór privadu sira, haktuir hosi nota imprensa.
Akordu “husu dezenvolvimentu hosi kampu estratéjiku 17, ho potensiál ida ne’ebé komprovadu hosi barríl petróleu billaun 65, investimentu ida liu dolar amerikanu billaun 100, no liu dolar billaun 209 iha impostu sira ba Estadu,” hatutan tan.
Iha loron-sesta mós, iha post ida iha Truth Social, Prezidente Estadus Unidus nian Donald Trump hatete, “Estadus Unidus Amérika nian foin halo Akordu ida ho Nasaun Venezuela kona-ba, NEGOSIU MINA-RAI BOOT LIU IHA ISTÓRIA MUNDIÁL!”
Iha loron 3 fulan-Janeiru, forsa militár sira Estadus Unidus nian lansa atake ho eskala boot ida hasoru Venezuela no kaer ho forsa Prezidente Venezuela Nicolas Maduro ho nia feen molok lori sira ba Nova Iorke.
Iha loron 29 fulan-Janeiru, Rodriguez fó sai aprovasaun ba reforma parsiál ida hosi lei hidrokarbonetu sira nasaun nian hodi permite partisipasaun privadu ne’ebé boot liu iha setór petrolíferu.
Fonte: Xinhua
Notísia relevante: Trump garante ‘seguransa totál’ ba investidór petrolíferu inklui ConocoPhillips iha Venezuela
