PM Xanana vizita CTC Bali, hametin protesaun biodiversidade mariña
DILI, 30 agostu 2026 (TATOLI) – Primeiru-Ministru (PM) Kay Rala Xanana Gusmão sesta ne’e vizita Coral Triangle Center (CTC) iha Sanur, Bali, Indonézia hodi haree diretamente programa no servisu konservasaun mariña.
Iha vizita ne’e, PM Xanana foku ba protesaun biodiversidade no jestaun rekursu tasi ne’ebé sustentável.
PM Xanana konsidera tasi no rekursu mariña la’ós de’it patrimóniu natureza, maibé mós parte importante husi moris, kultura no ekonomia komunidade.
Nia subliña katak Timor-Leste nu’udar parte husi rejiaun Coral Triangle, no iha responsabilidade boot atu proteje biodiversidade mariña.
“Tasi la iha fronteira. Korál ne’ebé moris iha tasi Timor-Leste iha ligasaun ho ekosistema mariña iha rejiaun tomak. Tanba ne’e, ita-nia responsabilidade mós komún,” PM Xanana hateten liuhusi nota ne’ebé TATOLI asesu husi Media Primeiru-Ministru, ohin.
Xefe Governu afirma katak konservasaun tasi tenki la’o hamutuk ho dezenvolvimentu komunidade no ekonomia azúl. Ida-ne’e liuhusi kooperasaun iha área siénsia, peskiza, formasaun, jestaun área mariña protejida no partisipasaun komunidade.
Iha fatin hanesan, Senior Marine Conservation Adviser CTC, Marthen Welly, fó boas-vindas ba PM Xanana ho delegasaun Timor-Leste.
Nia dehan CTC durante tinan barak servisu hamutuk ho Timor-Leste iha área konservasaun mariña, dezenvolvimentu kapasidade no jestaun área mariña protejida.
“CTC prontu kontinua fahe koñesimentu no esperiénsia iha área monitorizasaun ekosistema, restaurasaun korál, edukasaun ambientál, peskiza no peska sustentável,” nia afirma.
Marthen mós subliña importánsia partisipasaun komunidade no juventude atu garante sustentabilidade konservasaun mariña ba jerasaun sira iha futuru.
CTC mak organizasaun konservasaun mariña ne’ebé baze iha Bali. Organizasaun ne’e servisu iha Indonézia no Timor-Leste ho objetivu atu proteje biodiversidade tasi, korál no rekursu peskeiru, no apoia komunidade sira uza rekursu mariña ho maneira sustentável.
Iha Timor-Leste, CTC suporta programa konservasaun, inklui iha Ataúro, no kontinua servisu hamutuk ho Governu no komunidade lokál.
Iha vizita ne’e, PM Xanana akompaña husi Sekretáriu Estadu Florestas, Fernandinho Vieira, Xefe Gabinete Primeiru-Ministru no Diretora Ezekutiva Gabinete Fronteira Terrestre no Marítima, Elizabeth Exposto, ho delegasaun.
Jornalista: Hortêncio Sanchez
Editór: Evaristo Soares Martins
