Espesialista “Plastic Surgeon” husi Austrália halo operasaun ba labarik sira hamutuk 40
DILI, 31 Agostu 2026 (TATOLI)—Diretór Kliniku HNGV, Eligio A. de Araújo Soares, hateten mediku espesialista sirurjia pplástiku (Plastic Surgeon) husi Austrália halo operasaun ba labarik sira ho problema ibun sakat, isin kulit ahi han no bee manas luhas hamutuk 40.
“Iha fulan ne’e sira mai fali atu fó konsulta. Entaun, iha ne’eba ita simu labarik hamutuk 140 pasiente sira-ne’ebé mak tama iha prienxe kritéria sirurjia plástiku ne’e pasiente hamutuk 103. Depois ba labarik sira-ne’ebé mak planu atu halo operasaun ba labarik ne’e hamutuk 40,” Eligio A. de Araújo Soares hateten ba jornalista sira iha HNGV, ohin.
Espesialista husi Australia ne’e atu halo operasaun depende ba sira-nia kritériu tanba sira haree ba ida-ne’ebé mak sira bele halo intervensaun mak foti uluk pasiente sira-ne’ebé mak iha. Maibé, ezemplu pasiente balun ne’ebé mak sira opera antes maibé sira husu mai kontrola fila-fali balun idade seidauk to’o sira fó prioridade uluk ba ida-ne’ebé mak presiza liu
Ekipa mediku espesialista sirurjia plástiku sira-ne’e sei halo atendimentu pasiente sira iha HNGV durante semana ida, hodi fó atendementu ba labarik sira ne’ebé mak ho problema bee-manas luhas no ibun sakat.
“Ba labarik sira mai ho formasaun iha ibun-sakat ne’e kauza husi jenetika, entaun importante mak prevene durante inan isin-rua nian prevensaun no tratamentu sedu mak liuliu konsulta ante natal care, tenke rutina hodi nunee mediku sira fó tratamentu sedu liga ho kondisaun obstretika ne’ebé mak durante inan sira hetan,” nia hateten.
Husi operasaun ne’e médiku timoroan ida mak akompaña ba intervensaun sira husi sirurjia plátiku nian no médiku timoroan ida sei eskola iha Kuba ne’ebé foti espesialidade sirurjia plástiku nune’e ba futuru bele fó atendimentu ba pasiente sira.
Jornalista : Felicidade Ximenes
Editór : Cancio Ximenes
