Kandidatu traballadór 2.345 tuir teste médiku atu ba servisu iha Austrália-Japaun-Nova Zelandia

DILI, 31 Agostu 2026 (TATOLI)-Sekretária Estadu Formasaun Profisionál no Empregu (SEFOPE) liuhusi Diresaun Nasionál Empregu Estranjeiru (DNEE) halo rejistrasaun ba kandidatu tinan 2026 ne’ebé tuir teste médiku hodi ba servisu iha rai Austrália, Nova Zelándia no Japaun hamutuk 2.345.

Diretór Diresaun Nasionál Empregu Estranjeiru, João Correia Pereira, informa katak iha 2026 kuaze SEFOPE rejista kandidatu na’in-117 kompostu husi feto 13 no mane 105 mak hetan referénsia ba teste médiku atu ba servisu iha Nova Zelándia, maibé kandidatu na’in-95 mak susesu (aprovadu), na’in-5 falla no na’in-7 kansela.

“tinan 2026 ne’e mós ami rejista totál kandidatu ne’ebé tuir teste médiku hodi ba servisu iha Japaun, hamutuk 32 iha na’in-30 mk susesu (aprovadu) no na’in-2 mak failla”, Diretór DNEE relata ba Agência Tatoli iha nia kna’ar fatin City 8 Manleuana, ohin.

Nia hatutan 2026 sira mós rejista kandidatu ne’ebé tuir teste médiku ba servisu iha Austrália hamutuk 2.196, maibé iha na’in-2102 mak susesu (liu teste), na’in-72 falla, na’in-12 kansela no haruka na’in-11.

“Teste médiku sei foka liu ba fizikamente ema nian liuliu teste ba matan, ne’ebé presiza kondisaun di’ak hodi hala’o servisu iha rai li’ur, tamba teste sira-ne’e la’ós haree de’it ba esperiénsia servisu no lian nian maibé haree mós ba kondisaun saúde nian”, nia afirma.

Jornalista: Alexandra da Costa

Editór: Cancio Ximenes