Posibilidade, nomeasaun Xefe Departamentu 64 iha Oekusi akontese iha Setembru ne’e
OEKUSI, 31 Agostu 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régiu da Cruz Salu, segunda ohin, fó-sai katak, iha tempu-badak Governu Sentrál liuhusi Komisaun Funsaun Públika (KFP) hamutuk ho Ministériu Administrasaun Estatál (MAE) sei nomea xefe Departamentu 64 ba diresaun sira iha Oekusi.
“Tempu badak Komisaun Funsaun Públika mak sei lidera kona-ba desizaun nomeasaun estrutura xefe departamentu sira, tanba semana kotuk ita aprosima ona ho MAE atu finaliza prosesu ne’e, ne’ebé husi Ministru MAE mós konfirmadu ona sei akontese iha Setembru ne’e, nune’e bele públika iha Jornál Repúblika atu kompleta estrutura ne’e, hamutuk ema na’in-64,” nia hateten ba jornalista sira iha suku Naimeko, ohin.
Notísia relevante:Última hora: Ministru Tomas Cabral pose PA RAEOA ho estrutura na’in-24 iha Oekusi
Tuir nia analiza katak, durante ne’e programa barak paradu, tanba dezde fulan-Abríl 2026, diretór 21 no Sekretáriu Rejionál na’in-tolu simu ona pose, seidauk iha xefe departamentu hodi serví ba relatóriu, dadús inklui prosesu sira iha parte aprovizionamentu.
“Bainhira laiha xefe departementu, nia impaktu ne’e semak atu prepara atividade sira ne’ebé alvu, tanba tuir lei, Diretór labele, ne’e signifika katak interrese ne’e iha laran, kuandu ita haree ba kestaun legalidade, ne’e labele permite atu kontinua hanesan ne’e, durante ne’e diretór sira mesak de’it husi diresaun to’o kraik, ne’e labele,” nia afirma.
“Ezemplu real kona-ba bainhira kuandu laiha xefe departamentu semak atu konfirma dadus, preparasaun ba relatóriu no pedidu sira, tanba nia padraun ba aprovizionamentu ne’e tenke hahú husi xefe departementu,” nia tenik.
Notísia relevante:Bainhira Lei MPCC Vigora, Xefe Departamentu Sira Tenke Prepara-Aan Didi’ak
Jornalista: Abílio Elo Nini
Editór: Rafael Ximenes de A. Belo
