Prevene vírus raiva, Ekipa Veterináriu Vasina asu 260 iha Suku Bahalaraua’in
VIKEKE, 31 Agostu 2026 (TATOLI)—Xefe Departamentu Veterináriu Munisípiu Vikeke, Domingos do Carmo Pinto, informa atu prevene vírus raiva Ekipa Veterináriu Munisípiu Vikeke hamutuk Tékniku Veterenáriu Nasionál konsege vasina asu hamutuk 260 iha fatin afetadu rabies (raiva) iha Suku Bahalaraua’in, Postu Vikeke Vila.
“Iha semana kotuk ita rejista asu ne’ebe atu hetan vasinasaun. Ita destaka ita-nia Ekipa Veterináriu Munisípiu no apoiu husi nasionál ita bá fatin afetadu Suku Bahalaraua’in hodi fó vasina ba ita-nia komunidade nia asu sira-ne’ebé haki’ak hamutuk 260,” Domingos do Carmo Pinto ba TATOLI, iha Postu Vikeke Vila, Segunda ne’e.
Xefe Departamentu ne’e dehan vasinasaun iha Suku Bahalaraua’in foin vasina asu uitoan, asu barak mak seidauk vasina tanba komunidade haki’ak-na’in sira bainhira ekipa to’o iha iha sira-nia uma, sira laiha, entaun ekipa sira labele fó vasina.
Nia dehan, Munisípiu Vikeke rejista ona asu raiva pozitiva rua nune’e ba komunidade sira tenke kolabora ho ekipa veternária sira hodi fó vasinasaun ba asu sira atu labele afeta ba komunidade.
“Kona-ba prevensaun raiva, daudaun ne’e ami halo enkontru hamutuk ho Autoridade Munisípiu Vikeke, diresaun sira hanesan SMAPPF, Servisu Saúde Munispiu Vikeke no Servisu Água Saneamentu no Ambiente hodi tau-atensaun ba kazu raiva ne’ebé daudaun ne’e ita rejista iha Munisípiu Vikeke. Hafoin hala’o enkontru ho autoridade sira hotu, ami sei prepara karta no oráriu bá Suku Uma-Ki’ik hodi ba halo vasinasaun tanba iha Vikeke suku rua mak afetadu ona raiva kompostu husi Suku Uma-Ki’ik no Bahalaraua’in,” nia subliña.
Tuir dadus, tinan 2025 asu iha Munisípiu Vikeke totál hamutuk 1.220 ne’ebé hetan ona vasinasaun atu prevene vírus raiva. Numeru ne’e kompostu husi Suku Karaubalu hamutuk 800 no Suku Uma-Ki’ik hamutuk 420, maibé balun la vasina.
Daudauk ne’e, Ekipa Téknika Veternária hamutuk na’in-sia (9) kompostu husi Munisípiu Vikeke na’in-neen (6) no nasionál na’in-tolu (3) mak halo vasinasaun ba asu sira iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
