Tinan 2026: SEFOPE mobiliza ona traballadór timoroan ba rai-li’ur hamutuk 3.600
DILI, 31 Agostu 2026 (TATOLI)—Sekretáriu Estadu Formasaun Profisionál no Empregu (SEFOPE) liuhusi Diresaun Nasionál Empregu Estranjeiru (DNEE) konsege mobiliza ona traballadór timoroan ba servisu iha Japaun, Korea Súl, Austrália no Nova zélandia iha tinan 2026 hamutuk 3.600.
Traballadór timoroan hirak ne’e kompostu husi traballadór timoroan sira servisu iha Korea Súl hamutuk na’in-436, Austrália hamutuk na’in-3.116, Japaun hamutuk 13 no Nova Zelándia hamutuk ema na’in-35.
Diretór Diresaun Nasionál Empregu Estranjeiru, João Correia Pereira, hateten traballadór timoroan ne’ebé servisu iha Nova Zelándia liuhusi programa RSE 2026 hamutuk na’in-36 ne’ebé mesak mane de’it.
Kona-ba traballadór timoroan ne’ebé servisu iha Japaun, nia informa, liuhusi programa OTIT hahú husi 2023-2026 hamutuk na’in-77 kompostu husi mane 71 no feto na’in-neen (6), enkuantu dadus 2026 nian totál traballaxór hamutuk 13,” nia hateten ba Agência Tatoli iha nia kna’ar fatin City 8, Manleuana, ohin.
Nia dehan, traballadór hirak-ne’e ba servisu iha área soldadura, pintura, andamiu, perfurasaun no plamer.
“Totál traballadór timoroan ne’ebé servisu iha Korea Súl hahú husi 2009-2026 hamutuk 8.095 ne’ebé kompostu husi mane 7.866, feto 229. Iha tinan 2026 ne’e, SEFOPE konsege mobiliza ona traballadór timoroan ba Korea hamutuk 436, kompostu husi área peska 314, fábrika 99 no agrikultura 32,” nia informa.
Entretantu, traballadór timoroan ne’ebé servisu iha Austrália hahú husi 2012-2026 hamutuk 26.008, ne’ebé kompostu husi mane 18296 no feto 7.712, no traballadór foun iha na’in-11325 no tuan “re-entry” na’in-14.683.
“Traballadór timoroan ne’ebé mate hamutuk 22, iha na’in-11 mate iha Austrália, na’in-11 seluk mate iha timoroa ho ninia kauza mak asidente no moras. Aleinde ne’e, traballadór ne’ebé hetan moras iha na’in-36,” nia hateten.
Enkuantu, nia informa, totál traballadór ne’ebé halai sai husi sistema servisu ne’e hamutuk 1.456 ne’ebé kompostu husi mane na’in-1139 no feto 317.
Jornalista : Alexandra da Costa
Editór : Cancio Ximenes
