Urna Don Ricardo to’o ona iha Tasi-Tolu
DILI, 31 Agostu 2026 (TATOLI)–Urna Bispu Dioseze Dili, Don Alberto Ricardo da Silva, Segunda ne’e, Governu hamutuk ho Igreja ho sarani sira akompaña hodi tranzlada ona bá Tasi-Tolu, Dili.
Urna Don Alberto Ricardo iha Tasi-Tolu, ekipa konjunta nafatin fó tempu ba kada grupu iha ema na’in-20 mai kraik halo orasaun iha minutu rua to’o tolu nia laran.
Iha Tasi-Tolu, FALINTIL-Forsa Defeza Timor-Leste (F-FDTL) halo seguransa ho másima. Ekipa konjunta mós nafatin halo limpeza no rega ai-funan inklui hamoos estátua no fase rai-rahun iha altár oin.
Kardeál dehan ohin halibur hamutuk hodi halo misa despedida ida ho sarani hotu atu lori Urna Bispu Ricardo nian bá Tasi-Tolu atu hamutuk ho Preladu na’in-tolu ne’ebé aban (01/09) to’o iha TL.
“Aban pontu toleránsia, Governu konvida estudante sira hotu, no husu madre sira iha eskola favór ida fó korajen ba estudante aban tuir prosisaun hodi simu Preladu sira no misa iha Tasi-Tolu,” Don Virgílio do Carmo Kardeál da Silva apela ba sarani, iha Tasi-tolu.
Entretantu, Sarani Isabel da Silva, sente triste tanba lakon amu di’ak ida (Don Ricardo) ne’ebé durante nia moris halo misa iha Katedrál. Maibé, ohin sente kontente mós tanba Governu no Igreja konsidera Amu Bispu Don Ricardo ho Bispu na’in-tolu seluk hodi haloot iha fatin dignu.
“Ita nu’udár sarani agradese ba Governu no Igreja ne’ebé prepara fatin ne’ebé dignu ba ita-nia Amu Bispu Don Alberto Rircado. Ita hamutuk nafatin halo orasaun ba nia no ba Bispu na’in-tolu ne’ebé aban mós sei to’o iha Dili,” nia dehan.
Isabel hatutan Don Ricardo koñesidu hanesan figura relijioza ne’ebé hatudu umildade, bondade no servisu ba ema hotu. Durante nia moris, nia hahalok hatudu kompromisu ba Igreja no komunidade, liuhusi akompañamentu espirituál, ajuda ema ki’ak ne’ebé presiza liafuan sira ne’ebé fó esperansa ba ema.
Nia konsidera Don Ricardo nia maneira ko’alia no trata ema ho respeitu halo nia besik ba komunidade. Ba sarani sira, Don Ricardo la’ós de’it líder espirituál, maibé mós figura ne’ebé lori dame, unidade no esperansa.
“Agora, maski nia restu mortál to’o ona Tasi-Tolu, memória kona-ba nia hahalok no servisu sira sei hela iha ita sarani idak-idak nia laran no sai memória ba nia komunidade hotu,” nia tenik.
Jornalista: Osória Marques
Editór: Xisto Freitas da Piedade
