Família no Komisaun rekolla ona restu mortál Saudozu Siku Lú
VIKEKE, 01 Setembru 2026 (TATOLI)—Família hamutuk ho Komisaun Rekolla Restu Mortál husi Postu Administrativu Ossú, Munisípiu Vikeke, rekolla ona Saudozu Francisco da Silva ‘Siku Lú’ hodi entrega bá Osoariu restu mortál lokaliza iha Abana, Suku Builó.
Iha serimónia entrega restu mortál reprezenta família, Agostinho da Cruz, haktuir durante ne’e família sira esforsu buka saudozu ninia ruin, maibé la hetan nune’e foin lalais mak família sira kontinua esforsu buka mak hetan fali iha Munisípiu Aileu. Hafoin hetan, família sira koordena kedas ho parte Governu no Konsellu Veteranu hodi apoia kaixaun lori mai nia rai moris fatin Samarogo, Suku Uabubu, Postu Ossú, hodi kontinua haloot iha Osoáriu.
“Ita ukun an ona ne’e ami buka ona ami-nia aman nian ruin, maibé ami buka, buka no husu tuir nia maluk sira, la hetan. Foin lalais ne’e, iha fulan-Agustu nia laran, ami hetan fali iha Aileu. Ami koordea ho Konsellu Veteranu hodi oferese kaixaun, bandeira no ambulánsia lori saudozu mai nia rai moris fatin,” Agostinho da Cruz ba TATOLI, iha Aldeia Samarogo, Tersa ne’e.
Nia haktuir tempu okupasaun Indonézia saudozu nu’udár soldadu FALINTIL hamutuk ho nia maluk sira iha Aileu, depoiz ida-ne’e família sira la rona ona saudozu mate ka moris, maibé iha ukun rasik an família sira buka tuir fali afinál saudozu mate ona iha batalla.
“Ami família sira mós hakarak hato’o agradese ba parte Governu no veteranu sira, tanba apoia ona ami família sira rekolla ami-nia aman nia restu mortál. Ami-nia aman nia mate apoia ba luta libertasaun ida-ne’e nian. Durante iha funu ami-nia aman nunka mai haree família sira to’o mate,” nia hato’o.
Iha fatin hanesan, Komisaun Rekolla Restu Mortál, Sebestião Pereira Pires, subliña Saudozu Siku Lú mate iha área Ai-Krús, Munisípiu Aileu.
“Foin lalais 27 fulan-Agustu ne’e, mak família sira ba foti saudozu nia restu mortál,” Agostinho informa.
Biodata Saudozu Siku Lú
Saudozu Francisco da Silva ‘Sico Lú’ ho kódigu Sico Maukoli, moris iha loron 08 Agostu 1946, iha Ahabuu, oan husi Lú Naha, inan Hare Uatu. Saudozu Oan daruak husi maun-alin na’in rua, kompostu husi José da Silva no feton Sibalu.
Akontese invazaun Indonézia tama Timor-Leste iha tinan 1975, Saudozu Sico Lú ho membru família balun sai husi Dili no sa’e ba área Dare, tanba tropa Indonézia tama ona iha kapitál Dili. Iha prosesu sai husi baraka no buka bee, sira hasoru situasaun difísil tanba área ne’ebá serku ona hosi inimigu. Tanba situasaun ne’e, sira tenki halai no fahe malu.
Hafoin ne’e, Sico Lú hasoru membru FALINTIL balun no hahú envolve an diretamente iha luta armada hodi defende independénsia no soberania Timor-Leste.
Durante hanesan membru FALINTIL, Sico Lú nafatin kaer metin nia prinsipiu: “Mate ka moris ukun rasok-an.” Prinsípiu ne’e sai hanesan pontu forsa no korajen ba nia atu kontinua luta, maski hasoru situasaun todan, difísil no perigu ba nia vida.
Durante períodu okupasaun, Sico Lú nunka hetan oportunidade atu filafali hodi vizita nia família. Ikusmai, nia mate iha Mota Aikurus, Postu Administrativu Remexio, Munisípiu Aileu, iha tempu ne’ebé nia hala’o nia luta.
Jornada moris no luta Saudozu Sico Lú hatudu korajen, sakrifísiu, pasiénsia no kompromisu hodi defende independénsia Timor-Leste.
Jornalista: Vitorino Lopes da Costa
Editór: Xisto Freitas da Piedade
