Restu mortál líder Igreja na’in-tolu to’o Dili, Estadu no Igreja simu ho solenidade
DILI, 01 Setembru 2026 (TATOLI) – Aviaun Aero Dili ne’ebé lori restu mortál preladus líder Igreja Katólika na’in-tolu, Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes, aterra iha Aeroportu Internasionál Presidente Nicolau Lobato, Dili, iha tuku 13:42 OTL, hafoin lori husi Bali, Indonézia.
Molok aviaun to’o, desde tuku 10:00 OTL dadeer, sarani sira hahú halibur-an iha estrada Rotunda Presidente Nicolau Lobato to’o Aeroportu Internasionál Presidente Nicolau Lobato, atu hein no partisipa iha serimonia simu restu mortál líder Igreja na’in-tolu ne’e.
Estudante sira, membru koru Igreja, madre sira, amu-lulik sira, eskuteiru no sarani sira seluk okupa ona pontu oioin iha estrada ba aeroportu. Balun hatais roupa ne’ebé Governu no Igreja prepara, no balun seluk hatais atributu ne’ebé uluk uza bainhira simu Papa Francisco nia vizita apostólika ba Timor-Leste iha 2024.
Maski relójiu hatudu ona besik tuku 13:00 OTL, komunidade kontinua hein iha estrada, molok aviaun Aero Dili ne’ebé lori restu mortál sira aterra.
Iha área VIP aeroportu, kareta tolu prepara ona atu akompaña urna sira, no motorizada patrulla boot rua husi Polísia Militár Timor-Leste mós prepara atu asegura no akompaña korteju.
Grupu Kultural husi Parókia Imaculada Coração de Maria (PICOMA), Maubisse, mós prepara serimónia kulturál atu simu restus mortais líder Igreja na’in-tolu.
Iha aeroportu, membru Governu, deputadu Parlamentu Nasionál, ofisiál militár, lideransa Igreja no figura polítika Timor-Leste nian sira mós marka prezensa atu partisipa iha serimónia resepsaun.
Iha tuku 13:42 WTL, aviaun Aero Dili aterra iha Aeroportu Internasionál Presidente Nicolau Lobato. Iha área estasionamentu aviaun, poste sira ne’ebé normalmente iha bandeira, iha momentu ne’e mamuk no la iha bandeira ida mak hasa’e.
Membru Forsa Defeza Timor-Leste (F-FDTL) na’in-30 ho ekipamentu kompletu forma liña ida husi área pista to’o korredór ba sala VIP aeroportu, atu simu no fó onra ba restus mortais sira.
Iha oin liña, Ministru Administrasaun Estatál, Tomás do Rosário Cabral, lidera ekipa ne’ebé reprezenta Estadu iha prosesu resepsaun. Iha sorin seluk, Sekretáriu Estadu Komunikasaun Sosiál, Expedito Dias Ximenes, hamutuk ho profisionál mídia sira, mós akompaña prosesu ne’e.
Iha tuku 13:57 WTL, Ministru Tomás Cabral hamutuk ho ekipa lao ba aviaun ho Bandeira Nasionál Timor-Leste atu taka urna restus mortais sira.
Membru Polísia no F-FDTL na’in-11 ne’ebé nomeia espesiálmente simu responsabilidade atu lori urna sira husi aviaun ba área VVIP aeroportu.
Arsebispu Metropolitanu Dili, Dom Virgílio do Carmo da Silva, mós hamriik iha oin formasaun atu akompaña restus mortais sira ba sala VVIP, ne’ebé autoridade Estadu no dignitáriu Igreja sira hein ona.
Entre sira ne’ebé marka prezensa mak Prezidente Repúblika, José Ramos-Horta, Bispu Baucau no Bispu Maliana, lideransa polítika Mari Alkatiri, Tenente-Jenerál Lere Anan Timur, reprezentante diplomátiku Vatikanu iha Timor-Leste, no autoridade sira seluk.
Iha atmosfera nakonu ho silénsiu no solenidade, urna restus mortais sira lori tuir malu sai husi aviaun. Iha liña dahuluk, urna Monsenhor Martinho da Costa Lopes ne’ebé enfeita ho arranju ai-funan mutin ho forma krús; tuirmai urna Dom Jaime Garcia Goulart ho arranju ai-funan mutin ho krús; no iha liña datoluk, urna Dom José Joaquim Ribeiro.
Ho pasu neineik no iha silénsiu, autoridade sira akompaña urna na’in-tolu ne’e ba sala VVIP Aeroportu Internasionál Presidente Nicolau Lobato, hodi kontinua serimónia ofisiál resepsaun ba restus mortais líder Igreja sira ne’ebé fila fali ba rai Timor-Leste.
Depois husi VVIP sei lori restu mortál preladus líder Igreja Katólika na’in-tolu, Dom Jaime Garcia Goulart, Dom José Joaquim Ribeiro no Monsenhor Martinho da Costa Lopes, ba Tasitolu. Tuir ajenda ne’ebe iha, iha tuku 17:00 OTL sei iha misa.
Jornalista : Cidalia Fátima
Editora : Armandina Moniz
