SMA Kovalima identifika rai ektare 714 ho potensiál ba kultivasaun natar
KOVALIMA, 31 Agostu 2026 (TATOLI) – Servisu Munisipál Agrikultura (SMA) Kovalima, liuhusi Diretór Lino Magno, identifika área ektare 714 ne’ebé ho potensiál boot ba kultivasaun natar iha Suku Suai Loro, Postu Administrativu Suai, Munisípiu Kovalima. Inisiativa ne’e aliña ho Politika Nasionál ba Seguransa Ai-Han no Nutrisaun, ne’ebé estabelese estrutura servisu munisipál sira-nian hodi hametin setór agrikultura nasionál.
“Ha’u hakarak hato’o katak iha Suku Suai Loro área ne’ebé mak potensiál bazeia ba ami nia identifikasaun rai hamutuk ektare 714, husi dadus rai ektare 456 ne’ebé sai área kultivasaun,” Diretór Servisu Munisipál Agrikultura Kovalima, Lino Magno, relata dadus ne’e ba TATOLI.
Dirijente agrikultura ne’e dehan, SMA Kovalima identifika rai ektare 714 nu’udar área ho potensiál ba kultivasaun natar iha Suku Suai Loro, bazeia ba dadus husi funsionáriu estensionista sira ne’ebé fó asisténsia téknika diretu ba agrikultór sira iha terrenu.
“Rezultadu produsaun kada ektare, bazeia ba dadus husi ami nia tékniku estensionista sira ne’ebé uza métodu Ubinan, hatudu katak iha Kovalima, ba tinan-2026, produsaun natar kada ektare bele atinji tonelada 4,00,” nia dehan.
Lino hatutan katak, ho potensiál área ektare 714 ne’e, SMA Kovalima sei kontinua halo monitorizasaun no fó asisténsia téknika ba agrikultór sira atu nune’e área ne’ebé disponível bele uza ho másimu no produsaun natar bele aumenta tuir mehi Estratéjia Dezenvolvimentu Agrikultura Nasionál nian.
Nia dehan, apoiu tékniku ba agrikultór importante tebes, liuliu iha aplikasaun téknika kultivasaun moderna, uza fini ho kualidade di’ak, jestaun bee ba irrigasaun, no kontrolu praga ho moras ne’ebé bele afeta produsaun natar.
“Ami sei kontinua fó orientasaun no asisténsia téknika ba agrikultór sira atu bele aumenta produsaun no produtividade natar iha munisípiu,” nia dehan.
SMA Kovalima mós sei servisu hamutuk ho agrikultór sira no entidade relevante sira, inklui Ministériu Agrikultura, Pekuária, Peska no Floresta (MAPPF) atu aproveita área potensiál ne’ebé iha, ho objetivu atu aumenta produsaun ai-han no kontribui ba seguransa ai-han iha munisípiu no nasionál.
Bazeia ba dadus produsaun hare kulit ofisiál iha tinan-2025, produsaun hare kulit hosi postu administrativu sira iha Kovalima hanesan Fatululik, Fatumean, Fohorem, Tilomar, Maukatar, Suai no Zumalai—hamutuk atinji husi tonelada rihun-11 to’o rihun-12.
Entretantu, dadus produsaun hare kulit ba tinan-2026 seidauk disponível atu fó sai ba públiku, tanba prosesu levantamentu no konsolidasaun dadus produsaun iha terrenu sei hala’o hela husi ekipa téknika sira.
Jornalista: Celestina Teles
Editór: Rafael Ximenes de A. Belo
