Beredu’u louva prosesu tranzladasaun restu mortál Preladu Katóliku Na’in-Tolu mai Timor-Leste

BAUKAU, 02 Setembru 2026 (TATOLI)—Eis Prezidente Konsellu Munisipál Kombatente Libertasaun Nasionál (CMCLN-sigla portugeza) Baukau, Fernando Beredu’u Gusmão, louva ho esforsu Igreja no Estadu ne’ebé rezulta tranzlada restu mortál Preladu Katóliku Nain-Tolu kompostu husi Bispu Jaime Garcia Goulart, Bispu José Joaquim Ribeiro no Administradór Apostoliku, Monseñor Martinho da Costa Lopes mai rai Timor hafoin tinan naruk haloot iha Portugál.

“Ami kontente ho Prezidente no Primeiru-Ministru nia esforsu, mak ita-nia Preladu Katóliku Na’in-Tolu nia ruin to’o fali mai iha Timor. Nee mak sentidu domin timor-oan nian,” Beredu’u hateten iha Vila Nova, Baukau, Kuarta ne’e.

Eis Prezidente CMCLN Baukau rekomenda ba Estadu atu kontinua esforsu liuliu halo koordenasaun ho Estadu Indonézia hodi buka tuir restu mortál Prezidente Dahuluk Nicolau Lobato ne’ebé to’o agora seidauk hatene nia paradeiru.

Aleinde ne’e, Beredu’u husu mós atu buka tuir restu mortál líder FALINTIL seluk ne’ebé asume kargu importante durante luta no lakon vida iha okupasaun Indonézia hanesan hanesan Kilik Wai-Gae, David Alex Daitula no sira seluk tan.

“Prezidente Repúblika ho Primeiru-Ministru tenke koordena nafatin ho Indonézia para buka tuir, tanba David Alex nian ne’e sira dehan nia ruin iha ona, maibé família balun la aseita,” Beredu’u rekomenda.

Tuir nia, nasaun Timor-Leste no Indonézia iha relasaun bilaterál no amizade ne’ebé konsidera hanesan maun-alin no la’ós hanesan tempu pasadu liuliu tempu okupasaun, tanba ne’e aprosima para lori fila eroi hirak-ne’e nia restu mortál.

Jornalista: Natalino Belo 

Editór: Xisto Freitas da Piedade