Família simu restu mortál Monseñor Martinho Lopes ho matan-been: “Ami Husu Perdaun, Aman!”
MANATUTU, 02 Setembru 2026 (TATOLI)–Família no komunidade Laleia simu restu mortál Monseñor Martinho da Costa Lopes ho matan-been no simu ho serimónia kulturál.
Kareta ambulánsia ne’ebé akompañadu husi FALINTIL-Forsa Defeza Timor-Leste ( F-FDTL) no Polísia Nasionál Timor-Leste (PNTL) ne’ebé orna ho bandeira RDTL no FALINTIL nian, hakbesik an no tama iha odamatan-boot knua Laleia nian, simu ho dadolin tuir kultura Manatutu nian.
Iha lian dadolin be semo aas ne’e, komunidade wa’in ba wa’in hamriik ho laran ksolok hodi espresa sira-nia domin ho matan-been monu. Komunidade ida-idak, tuir ida-idak nia fiar, hakneak tuku turr ba rai hodi hasa’e orasaun ho matan-been turu.
“Ami husu perdaun ba ita, Aman Monseñor. Ita-nia luta boot tebes. Tinan barak ita iha Portugál ne’ebá. Ohin ita mai ona. Ami simu ho laran kontente, maske ami tanis maibé ami orgullu,” Reprezentante Família, Cristovão da Costa, hateten ho lian makaas hodi simu Monseñor Martinho Loppes nia urna.
Durante oras ida, familia no komunidade fó omenajen ikus hodi lolo liman kaer urna ne’e, hafoin dada hikas liman hodi tau ba sira-nia hirus matan. Tada ida katak, Monseñor Martinho Lopes, nia domin sira tau iha sira-idak nia fuan atu memoriza husi otas ba otas.
Jornada ba Uma
Hafoin oras ida iha rezidensia, Padre Paróku Laleia ne’ebé akompañadu husi Sekretáriu Estadu Komunikasaun Sosiál Expedito Dias Ximenes, Prezidente Autoridade Munisípiu Baukau, Prezidente Autoridade Munisípiu Manufahi, autoridade seguransa no komunidade Laleia halo prosisaun hodi lori urna ne’e ba hatuur iha iha Igreja Laleia.
Iha ne’ebá, Monseñor Martinho Lopes nia urna hatuur iha kalan ida-nia laran, sarani sira halo venerasaun no sei hafoin misa ramata.
Aban, kinta (02 Setembru 2026), tuir oráriu katak Monseñor nia urna sei translada ba Manatutu Vila no hafoin ne’e sei lori fila urna ne’e ba Dili, hodi hein loron ikus iha 10 Setembru ne’e hodi haloot hamutuk ho urna bispu na’in-tolu seluk iha Katedrál Dili.
Governu no Igreja Servisu Hamutuk
Iha momentu ne’e, família agradese ba Governu ne’ebé kolabora ho Igreja Katólika Timor-Leste no Portugál hodi lori fila restu mortál preladu na’in-tolu ne’ebé inklui mós ho Monseñor Martinho Lopes nia urna.
“Obrigadu tanba lori fila ami-nia aman ba nia rain,” dehan família sira ho laran susar no ho laran ksolok.
Jornalista : Hortêncio Sanchez
Editór : Cancio Ximenes
