Governu aprova Planu Mediu Prazu 2027-2030 hodi foka ba diversifikasaun ekonomia
DILI, 02 Setembru 2026 (TATOLI)—Governu aprova proposta husi Ministru Planeamentu no Investimentu Estratéjiku, Gastão Francisco de Sousa, ne’ebé aprezenta kona-ba Planu Mediu Prazu 2027-2030, ne’ebé sei estabelese prioridade prinsipál no meta dezenvolvimentu ba tinan haat governasaun oin mai no nu’udar faze finál ba implementasaun Planu Estratéjiku Dezenvolvimentu (PEDN) 2011-2030.
Planu ne’e iha objetivu atu aselera dezenvolvimentu ekonómiku no sosiál nasionál liuliu foka ba diversifikasaun ekonómika, kriasaun empregu, melloria infraestrutura no servisu públiku, dezenvolvimentu kapitál umanu nomós reforsu instituisaun, atu nune’e bele hamenus dependénsia ba reseita petrolífera no kria kondisaun ba kreximentu ekonómiku ida-ne’ebé sustentável liu.
Ministru Planeamentu Investimentu Estratéjiku, l Gastão Sousa, hateten ohin nia aprezenta kona-ba planu mediu prazu 2027-2031. Nune’e, ohin, hetan tiha ona aprovasaun, hein ba faze lansamentu nian de’it.
Ministru hatutan ida-ne’e diskusaun iha nível tékniku, no nivel asuntu dezenvolvimentu institusionál, asuntu ekonómiku, asuntu sosiais no infraestrutura, hodi hetan aprova planu médiu prazu 2027-2031.
“Tanba ne’e maka Goved Rnu tenke iha prioridade atu aliña mós planu mediu prazu ne’e, hodi haree oinsá atu haree ba iha diversifikasaun ekonómika liuliu setór naun-petrolíferu, tanba hanesan ita-boot sira hatene katak ita-nia fundu petrolíferu tuir prediksaun péritu sira katak sei hotu iha tinan 2033-2035,” Ministru ne’e relata ba jornalista sira iha Palásiu Governu, ohin.
“Tanba ne’e, tenke diversifika ita-nia ekonomia atu bele fó moris naruk tan ba ita-nia fundu petroliferu hodi hein dezenvolvimentu Greater Sunrise,” nia dehan.
Enkuantu, nia esplika, proposta ne’e define prioridade estratéjiku nasionál sanulu ne’ebé inklui reforma propriedade no rejistu rai, asesu finansiamentu husi empreza mikro, kiik no mediu, dezenvolvimentu ekonomia azúl no turizmu, hadi’a lojístika no ligasaun entre zona produsaun no merkadu sira, aumenta produtividade agríkola no área irrigasaun sira, reforsa formasaun profisionál, hadi’a fornesimentu eletrisidade no bee ba zona ekonómika sira nomós kria kondisaun ne’ebé di’ak-liu ba investimentu privadu.
Aleinde planu ne’e mós estabelese meta no indikadór konkretu sira atu akompaña rezultadu ne’ebé alkansa to’o tinan 2030, ho mekanizmu monitorizasaun no avaliasaun regulár sira, permite Governu monitoriza ezekusaun prioridade ne’ebé define ona no ajusta intervensaun sira bainhira de’it presiza.
Jornalista : Alexandda da Costa
Editór : Cancio Ximenes
