Governu aprova rejime espesiál kontratasaun públika ba preparasaun TL sai Prezidénsia ASEAN 2029

DILI, 02 Setembru 2026 (TATOLI)—Governu aprova projetu Dekretu-Lei kona-ba rejime espesiál kontratasaun públika ne’ebé aplika ba preparasaun no ezersísiu Prezidénsia ASEAN husi Timor-Leste iha tinan 2029.

Projetu Dekretu-Lei ne’e aprezenta direta husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, iha reuniaun Konsellu Ministru, ohin.

Diploma ne’e estabelese rejime exepsionál no temporáriu ida hodi aselera kontratasaun obra konstrusaun ka reabilitasaun ba infraestrutura iha Munisípiu Dili ne’ebé nesesáriu ba preparasaun Prezidénsia ASEAN nian, nune’e mós bens no servisu ne’ebé asosiadu diretamente ho preparasaun, ezekusaun, fiskalizasaun no konkluzaun obra hirak ne’e.

Aleinde rejime ne’e mós inklui, liuliu ho konstrusaun Sentru Konvensaun, ne’ebé tenke funsiona tomak ona iha tempu tuir kalendáriu preparasaun Prezidénsia ASEAN nian.

Diploma ne’e mós atribui ba Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, la haree ba valór kontratu nian, kompeténsia atu hala’o aktu administrativu no finanseiru sira-ne’ebé nesesáriu ba ninia kontratasaun, inklui autoriza despeza no abertura prosedimentu, aprova adjudikasaun no selebra kontratu hodi Estadu nia naran.

Prosedimentu sira hetan tramitasaun husi servisu aprovizionamentu entidade adjudikante nian, no Komisaun Nasionál Aprovizionamentu no Ajénsia Dezenvolvimentu Nasionál bele fornese apoiu tékniku bainhira husu. Fiskalizasaun prévia husi Kámara Konta mantein ba kontratu sira-ne’ebé liu millaun $5.

Nune’e, rejime ida-ne’e vigora to’o 31 fulan-Dezembru 2029, no ho objetivu atu garante katak infraestrutura ne’ebé nesesáriu prepara tuir prazu ne’ebé estabelese ona atu Timor-Leste bele sai uma-na’in no ezerse Prezidénsia ASEAN nian iha tinan 2029.

Jornalista : Alexandra da Costa

Editór        : Cancio Ximenes