Governu orienta MI reforsa kontrolasaun ba seguransa infraestrutura elétrika públika
DILI, 02 Setembru 2026 (TATOLI)—Governu liuhusi desizaun koletiva Konsellu Ministru orienta ka fó instrusaun ba Ministériu Interiór atu reforsa kontrolasaun ba seguransa infraestrutura elétrika públika (kabu subterañeo), ne’ebé hetan estragu husi ema koñesidu iha Bekora.
Vise-Ministru Asuntu Parlamentár, Adérito Hugo da Costa, hateten kona-ba kabu subterañeo ne’ebé daudaun ne’e instala ona iha rai-okos, maibé foin iha semana kotuk iha akontesimentu ema deskoñesidu balun haba halo estraga tiha fasilidade sjira-ne’e.
“Entaun orientasaun husi Primeiru-Ministru ba Ministériu Interior hodi haree kestaun ida-ne’e liuliu liga ho seguransa nian, tanba ne’e ohin sira hali kedas aprezentasaun kaptura ona ema sira-ne’ebé deskonfia komete iha aktu ne’e hodi prosesa tuir lei,” Vise-Ministru ne’e relata ba jornalista sira iha Palásiu Governu, ohin.
Nune’e, nia dehan, ba oin planu atu estabelese postu seguransa iha sítiu importantre sira hodi halo kontrola no proteje ba fasilidade Estadu no posibilidade sei monta mós kámera CCTV.
“Tanba tuir aktu vandalizmu foin lalais hasoru infraestrutura eletrisidade públika, Konsellu Ministru deside fó instrusaun ba Ministru Interiór atu promove koordenasaun nesesária hodi reforsa polisiamentu besik infraestrutura sira-ne’e no koordena ho Ministériu Obra Públika,” nia dehan.
Enkuantu objetivu ida hodi adota medida ho objetivu atu hasa’e protesaun ba ekipamentu sira-ne’e, atu nune’e bele prevene akontesimentu foun no seguransa ba funsionamentu infraestrutura elétrika públika.
Jornalista : Alexandra da Costa
Editór : Cancio Ximenes
