Konstrusaun edifísiu maternidade iha HNGV atinje ona 35%
DILI, 02 Setembru 2026 (TATOLI)—Ministra Saúde, Elia dos Reis Amaral, informa konstrusaun edifísiu maternidade iha Hospitál Nasionál Guido Valadares (HNGV) ne’e atinje ona 35% no sei konklui iha tinan 2027.
“Tuir planu konstrusaun ne’e sei termina tuir timeline ne’ebé mak ekipa tekniku sira fó mak sei konklui iha fulan-Abríl 2027. Sira sei entrega konstrusaun, entrega mós ekipamentu médiku no non médiku, tuir timeline ne’ebé mak sira hato’o mai ita,” Elia dos Reis Amaral hateten ba jornalista sira, ohin.
Entretantu, Diretór Servisu Apoiu Diagnóstiku no Terapêutika Iha Hospitál Nasionál Guido Valadares (HNGV), Vidal Lopes, hateten kontrusaun edifísiu maternidade iha HNGV daudaun ne’e atinje ona 35%.
“Projetu ida apoiu husi JICA ne’e ninia atinjimentu porvolta 35 % ona, maibé atu hatene liu ne’e só tékniku sira mak informa ida-ne’e. Maibé tentativamente, iha 2027 ne’e entrega ona ba Governu,” Vidal Lopes hateten ba jornalista sira iha HNGV, Bidau, ohin.
Antes ne’e, Ministra Saúde, Elia dos Reis Amaral, hato’o agradesimentu ba Governu Japaun ne’ebé fó apoia millaun $20 ba Governu Timor-Leste atu harii maternidade foun iha Hospitál Nasionál Guido Valadares (HNGV).
“Ha’u hato’o agradesimentu ba povu Japaun ne’ebé apoiu Timor-Leste atu harii maternidade foun iha HNGV, tanba ami halo ona asinatura MoU ho JICA ne’ebé mak define husi Governu Japaun. Ita hetan apoiu másimu husi povu Japaun no ida-ne’e kontinuasaun atu harii edifísiu konstrusaun ba maternidade foun. Signifika edifísiu pediatria ne’ebé mak iha sei iha liña koneksaun ba iha maternidade,” Ministra Elia dos Reis Amaral informa ba jornalista sira hafoin partisipa reuniaun Konsellu Ministru.
Kontratu ba servisu konstrusaun liuhusi JICA nia projetu hadi’a Hospitál Nasionál Guido Valadares (HNGV) asina ona husi Ministériu Saúde no Wakachiku Construction Co, Ltd, iha 27 Juñu 2025 iha Tokyo, Japaun.
Reprezenatnte Ministra Saúde, Diretór Jeral ba Servisu Koorporativa, Valentino Lisboa Marçal asina kontratu ne’ebé sasin husi Conselor ba Embaixada Timor-Leste iha Japaun, Celio Moniz da Silva no Diretora Jerál ba Unidade Jestaun Projetu Saúde iha Ministériu Saúde, Adelia Maria Moniz Barreto.
Ho lideransa Ministra saúde no envolvimentu husi Ministériu Saúde, hein katak konstrusaun sei hahú iha Agostu 2025 no sei ramata iha Abril 2027.
Edifísiu foun sei liga ba edifísiu foun Pediátriku no ICCU nian ne’ebé mak agora daudaun iha hela konstrusaun husi Ministériu Saúde, atu hadi’a liután efisiénsia no seguransa pasiente nian iha servisu emerjénsia médiku nian.
Akordu Subvensaun husi projetu ba Melloria Hospitál Nasionál Guido Valadares (HNGV) asina entre Ministru Finansa no Reprezentante Xefe JICA iha loron 20 Agostu 2024, hodi fornese ajuda subvensaun to’o biliaun yen $3.093 ne’ebé ekivale ho dolar amerikanu millaun $20.
Projetu ne’e inklui konstrusaun edifísiu foun ida ba pasiente ambulatóriu haat, departamentu sala operasaun sira, Departamentu Fornesementu Estéril Sentrál, Departamentu Traballu no Partu, no departamentu obstetrísia no jinekolojia, no mós fornesimentu ekipamentu médiku sira.
Jornalista : Felicidade Ximenes
Editór : Cancio Ximenes
