MP husu aplika medida koasaun Prizaun preventiva ba arguidu na’in-haat
KOVALIMA, 02 Setembru 2026 (TATOLI) – Tribunál Judisiál Primeira Instánsia Suai (TJPI) kuarta (2/9) hala’o julgamentu primeiru interrogatóriu ba membru Servisu Nasionál Intelijénsia (SNI) na’in-tolu no membru UPF na’in-ida, relasiona ho kazu Terezinha Cardoso lakon , iha Aldeia Wetaba, Suku Beiseuk, Postu Administrativu Tilomar, Munisípiu Kovalima.
Iha prosesu julgamentu ne’e Ministériu Públiku (MP) husu atu aplika medida koasaun Prizaun Preventiva ba arguidu.
Tuir kronolojia kazu, Terezinha Cardoso hakat ba nasaun viziña Indonézia iha loron 4 Juñu 2026 no fila fali mai Timor-Leste iha loron 24 Juñu 2026.
Diresaun Servisu Investigasaun Kriminál (DSIC) no Diresaun Servisu Informasaun Polísia (DSIP), hamutuk ho Komandu PNTL Munisípiu Kovalima, ezekuta mandadu husi Tribunál Judisiál Primeira Instánsia Suai hodi kaptura no detein arguidu na’in-haat, ne’ebé kompostu husi membru SNI na’in-tolu no membru UPF na’in-ida.
Arguidu na’in-haat ne’e kaptura iha loron 31 Agostu 2026 no detein iha sela Polísia Komandu PNTL Munisípiu Kovalima durante oras 72, bazeia ba Nú. 0016/26CVSUI.
Hafoin kumpri ona detensaun durante oras 72, iha loron 2 Setembru 2026, DSIC no DSIP lori membru SNI na’in-tolu no membru UPF na’in-ida ba TJPI Suai hodi tuir prosesu julgamentu primeiru interogatóriu.
Arguidu na’in-haat to’o iha Tribunál iha tuku 08:44 dadeer hodi hein prosesu julgamentu primeiru interogatóriu, ne’ebé hahú iha tuku 09:40 remata iha 1:30
Arguidu na’in-haat ne’ebé tuir julgamentu primeiru interogatóriu ne’e ho inisiál NF, DC, JC no AMA, nu’udar membru UPF.
Defensór Públiku, Domingos dos Santos esplika katak, alegasaun Ministériu Públiku husu atu aplika Medida koasaun prizaun preventiva ba arguidu na’in-haat (4).
“ Ministériu Públiku husu medida koasaun prizaun preventiva ha’u defeza ba sira na’in-haat alega katak arguidu sira nafatin ho medida TIR hodi hein investigasaun kle’an husi parte kompetente hodi bele aprezenta provas sira ne’e iha julgamentu tuirmai iha prosesu prosesu komum ho normál”, Defensór Públiku, Domingos dos Santos, hato’o hafoin julgamentu iha TJPIS.
Defensór ne’e , durante hala’o prosesu Julgamentu iha sala audénsia julgamentu, arguidu na’in-haat deside hodi hili direitu atu ko’alia.
MP husu alega medida koasaun Prizaun Preventiva ho tipu Kazu omesídiu simples ne’ebé prevista Iha kodigu penál artigu 138.
Tuir planu Tribunál Judisiál Primeira Instánsia Suai sei fó sai despaixu ba arguidu na’in-haat iha tuku 10 dadeer
Audénsia julgamentu ne’e prezide husi juís turnu husi Ministériu Públiku reprezenta husi prokuradór Renato Bere Nahac,Arguidu sira hetan asisténsia legál husi Defensór Públiku Domingos dos Santos.
Durante prosesu julgamentu, seguransa maksimu asegura husi Komandu Polísia Nasionál Timor-Leste (PNTL) Munisípiu Kovalima, ho akompañamentu husi Unidade Polísia Militar (UPM), Unidade Patrulhamento Fronteira (UPF), Batallaun Operasaun Polísia (BOP) no F-FDTL.
Jornalista: Celestina Teles
Editór: Rafael Ximenes de A. Belo
