MPIE aprezenta rezultadu análize kustu ba materiál konstrusaun fó impaktu ba obra infraestrutura
DILI, 02 Setembru 2026 (TATOLI)—Ministru Planeamentu Investimentu Estratéjiku (MPIE), Gastão Sousa, akompaña ho Ajénsia Dezenvolvimentu Nasionál (ADN) hodi halo aprezentasaun kona-ba rezultadu análize ida ba kustu aluga ekipamentu pezadu no kombustível nomós nia impaktu ba obra infraestrutura sira liga ho funu iha médiu oriente.
Ministru Planeamentu Planeamentu Investimentu Estratéjiku, Gastão Sousa, hateten ohin sira halo aprezentasaun iha Konsellu Ministru kona-ba ba presu ekipamentu pezadu nian, ne’ebé ho funu ne’ebé akontese presu kombustível sa’e, entaun ne’e sei iha impaktu ba emprezáriu timoroan sira.
“Ne’ebé, ohin, diskute no ami aprezenta kona-ba presu kombustível sa’e ne’e, entrega tomak ba MPIE ho ADN atu haree hodi deside presu ne’ebé iha. No, ami sei haree liu ba projetu ne’ebé ezekuta no projetu ne’ebé asina kontratu ona, tanbasá mak la ezekuta haree liu ba ida-ne’e,” Ministru Gastão informa ba jornalista sira iha Palásiu Governu, ohin.
Nia esplika, iha nálize ne’e kompara kustu referénsia sira-ne’ebé uza daudaun ho valór ne’ebé rezulta husi dadus sira-ne’ebé foun liu, nomós avalia impaktu husi aumentu iha folin aluga ekipamentu pezadu no kombustível iha ezekusaun obra sira liuliu iha setór rodoviáriu nian.
Nune’e, nia dehan, rezultadu hatudu posibilidade presiza atualiza presu referénsia ne’e atu nune’e bele reflete aumentu iha kustu ezekusaun nian.
Jornalista : Alexandra da Costa
Editór : Cancio Ximenes
