CEPAD promove manuál foun ba dezenvolvimentu lideransa foinsa’e
DÍLI, 03 Setembru 2026 (TATOLI) – Centro de Estudos para a Paz e o Desenvolvimento (CEPAD) lansa ofisialmente Manuál Formasaun kona-ba Lideransa Foinsa’e, ne’ebé dezeña atu ajuda foinsa’e sira dezenvolve kapasidade lideransa no transforma sira-nia enerjia, kreatividade no kompromisu ba asaun konkreta hodi kontribui ba dezenvolvimentu komunidade no nasaun.
Lansamentu manuál ne’e realiza iha Salaun Luz Clarita, Bairo Formosa, Díli, ho partisipasaun husi reprezentante juventude, organizasaun sosiál, parseiru dezenvolvimentu no entidade relevante sira.
CEPAD hateten katak foinsa’e sira iha Timor-Leste kontinua hatudu kontribuisaun importante ba komunidade no nasaun. Maibé, entuziasmu mesak la sufisiente atu transforma ideia no aspirasaun ba mudansa real.
Tanba ne’e, manuál foun ne’e prepara nu’udar guia prátiku ba foinsa’e sira atu dezenvolve kapasidade iha lideransa, komunikasaun efetiva, servisu ekipa, foti desizaun, rezolusaun problema no partisipasaun iha atividade komunidade.
Diretór Ezekutivu CEPAD, João Boavida, dehan lideransa foinsa’e la’ós de’it kona-ba kapasidade atu ko’alia iha públiku, maibé mos kona-ba kapasidade atu transforma liafuan no ideia ba asaun konkreta ne’ebé bele lori benefísiu ba komunidade.
“Lideransa foinsa’e la’ós de’it kona-ba sé mak bele ko’alia; maibé kona-ba sé mak iha kbiit no fiar-an atu nakfila saida mak nia ko’alia ba asaun ida konkreta ne’ebé di’ak ba komunidade,” hateten João Boavida.
Nia esplika katak manuál ne’e sei ajuda foinsa’e, grupu juventude, edukadór no organizasaun komunidade sira atu dezenvolve modelu lideransa ne’ebé bazeia ba realidade lokál no responde ba nesesidade komunidade.
CEPAD hein katak rekursu formativu ne’e bele kontribui ba kriasaun jerasaun lider foinsa’e foun ne’ebé iha inisiativa, espíritu kolaborativu no kapasidade atu lori mudansa pozitivu iha sira-nia komunidade.
Iha atividade lansamentu ne’e, Prezidente Komisaun Nasionál Juventude Timor-Leste (CNJTL), Maria Dadi Soares Magno, sai nu’udar oradór prinsipál ho tema “Foinsa’e Kria Oportunidade: Lidera ho Integridade, Harii Komunidade ida Forte no Justu.”
Maria Dadi enfatiza katak foinsa’e sira tenke haree an la’ós de’it nu’udar lider iha futuru, maibé nu’udar lider ne’ebé hahú hala’o responsabilidade no servisu husi agora.
“Foinsa’e la hein futuru. Foinsa’e mak futuru,” dehan Maria Dadi.
Nia hateten katak integridade, responsabilidade no servisu hamutuk ho komunidade mak elementu importante sira atu harii lideransa ne’ebé forte no sustentável.
Iha programa hanesan parte husi lansamentu manuál ne’e, reprezentante International Labour Organization (ILO), Tendy Gunawan, mos aprezenta tema “Husi Treinamentu ba Empregu Verde: Oinsá Planu Asaun Ki’ik Foinsa’e Sira Bele Transforma ba Negósiu Agrofloresta.”
Tendy Gunawan hateten katak foinsa’e sira iha papel importante atu promove inovasaun no empregu verde iha Timor-Leste.
Nia enkoraja foinsa’e sira atu transforma koñesimentu husi treinamentu no planu asaun ki’ik sira ba inisiativa empreendedór ne’ebé bele kria rendimentu no, iha tempu hanesan, apoia sustentabilidade ambientál.
Lansamentu manuál lideransa ne’e hatudu kompromisu CEPAD atu investe iha dezenvolvimentu kapasidade juventude iha Timor-Leste, hodi foinsa’e sira la’ós de’it prepara an ba lideransa iha futuru, maibé mos bele lidera no kontribui ba mudansa pozitivu husi agora.
Jornalista: Camilio de Sousa
Editór: Filomeno Martins
