KSTL lansa sistema jestaun keixa online fasilita traballadór sira bainhira hetan problema
DILI, 03 Setembru 2026 (TATOLI)—Konfederasaun Sindikatu Timor-Leste (KSTL) lansa sistema jestaun keixa online ne’ebé bele fasilita traballadór sira hodi hato’o keixa bainhira hetan problema hanesan asédiu, limitasaun ba direitu traballu iha servisu fatin.
Prezidente KSTL, Almério Vila Nova, KSTL hakat ona pasu importante tebes iha era teknolojia nian ho dezenvolvimentu sistema jestaun keixa online ba traballadór sira no sistema ne’e rasik hetan apoiu husi Organizasaun Mundiál Traballu (ILO).
“Sistema ne’e bele fornese plataforma ida-ne’ebé sentralizadu, entaun traballadór sira bele hato’o ona keixa husi online la presiza hato’o diretamente, signifika iha área rurál mós bele asesu,” Prezidente KSTL ne’e relata iha Suai Room Timor-Plaza, ohin.
Nia dehan, maneira asesu ne’e bainhira traballadór ida sente ladun konfortavel no iha violasaun direitu ba sira bele hato’o liuhusi manda dokumentu evidénsia ruma no fetografia ka vídeo ruma, ne’ebé bele haforsa evidénsia, nune’e KSTL iha obrigasaun no responsabilidade atu simu pedidu keixa no to’o rezolve keixa ne’e.
“Entaun sistema ne’e sei fó konfiansa no brani ba traballadór sira, tanba ami sei garante ninia seguransa no efisiénsia keixa nian ka sei la fó sai privasidade ema ida-nian ba ema seluk. Nune’e ami sei halo sosializasaun sistema ne’e ba empregadór no traballadór sira atu utiliza,” nia dehan.
Inspetór Jerál Traballu, Frederico Matos, hateten KSTL sai nu’udar parséria ida ho IJT hodi tau matan ba traballadór sira hotu, nune’e inisiativa husi estabelese sistema jestaun keixa ne’e nu’udar alternativa di’ak ida-ne’ebé bele fasilita servisu.
Inspetór ne’e mós konsidera katak sistema dijitalizasaun ne’e bele fasilita traballadór sira hodi hato’o sira-nia keixa bainhira hetan problema iha servisu fatin, duké imi enfrenta problema ruma tauk atu hateten sai, entaun ho sistema ne’e sei garante privasidade no seguransa.
“Entaun sistema ne’e bele ajuda tebes hakbesik traballadór ho sindikatu atu rezolve problema ho lalais no efisiénsia. Tanba ne’e, ami apresia tebes ho servisu KSTL nian,” nia hateten.
Tuir Vise-Prezidente CCITL, Fraquelino da Costa Freitas, reforsa tan katak CCITL nu’udar mahon ba setór privadu sai parseiru importante ho sindikatu sira no Governu atu oinsá hasa’e kresimentu ekonomia iha Timo-Leste.
“Nune’e ho sistema ne’ebé KSTL ho ILO estabelese sai hanesan avansa boot iha teknolojia, tanba ne’e ami bele alerta ba setór privadu sira atu asesu sistema ida-ne’e hodi rezelve keixa ruma ne’ebé akontese iha servisu fatin entre empregadór no traballadór,” Vise CCITL ne’e hateten.
Iha oportunidade ne’e, tuir reprezentante traballadór Sahabat Timor, Azia Pereira, hato’o agradesimentu ba inisiativa husi KSTL no ILO nian hodi fasilita sistema jestaun keixa bainhira hasoru problema iha servisu fatin, sira bele hato’o keixa liu husi sistema ne’e rasik.
“Sistema dijitál ida-ne’e bele fasilita trabalhadór sira iha Timor laran tomak liu traballadór sira-ne’ebé iha área rurál sira mós bele hato’o keixa ruma ba KSTL. Tanba sistema ne’e garante ninia seguransa no privasidade, entaun ita labele dúvida no tauk,” nia esplika.
Jornalista : Alexandra da Costa
Editór : Cancio Ximenes
