MJDAK mantein millaun $11-resin iha tetu orsamentu 2027
DILI, 03 Setembru 2026 (TATOLI)—Ministru Juventude Desporte Arte no Kultura (MJDAK), Nelyo Isaac Sarmento, informa iha tetu Orsamentu Jerál Estadu (OJE) tinan 2027 mantein millaun $11-resin hanesan ho Orsamentu Jerál Estadu (OJE) 2026 nian.
“Ami-nia orsamentu ba tinan 2027 nian nafatin hanesan iha tinan kotuk (2026) katak laiha mudansa,” Ministru Nelyo Isaac Sarmento hateten ba Agência Tatoli iha Palásiu Governu, ohin.
Programa prioridade ba tinan 2027 ne’e, nia dehan, kuazé laiha programa foun barak iha KRP 2027 maibé sei integra de’it programa foun balun de’it.
“Programa foun ne’e, ami integra tan rua de’it mak emprendedorizmu dijitál ba joven sira. Ne’e hanesan atu promove joven sira iha bussines online ninian no programa seluk mak iha arte kultura nian, ne’ebé konsidera katak Dili ne’e sai sentru ba kultura CPLP nian,” nia dehan.
Nia hatutan, hafoin ida-ne’e kontinua nafatin ho afiliadu desportu sira no mós partisipasaun atleta sira iha nivel internasionál.
Lembra katak Orsamentu Jerál Estadu (OJE) 2026 ne’ebé aloka ba MJDAK hamutuk$11.308,437 kompostu husi saláriu vensimentu $2.360,216, bens servisu $1.537,535 no transferénsia públika $6.187,995.
Jornalista : Alexandra da Costa
Editór : Cancio Ximenes
