Peskadór Bidau Santa-Ana preokupa ho planu Governu muda bero peska ba Dolok Oan
DÍLI, 02 Setembru 2026 (TATOLI) – Komunidade peskadór sira iha Bidau Santa-Ana, Díli, rejeita planu Sekretaria Estadu Asuntu Toponímia no Organizasaun Urbana (SEATOU) atu muda fatin para bero peska sira husi tasi-ibun Bidau Santa-Ana ba área Dolok Oan, iha kotuk Kristu Rei.
Peskadór sira konsidera katak Dolok Oan dook no la’ós fatin ne’ebé seguru no fasil atu hala’o atividade peska loroloron.
Reprezentante peskadór, António da Silva, hateten SEATOU informa ona ba komunidade sira kona-ba planu ne’e hodi objetivu atu fó espasu ba projetu Governu atu dezenvolve tasi-ibun Bidau Santa-Ana sai jardin públiku.
“SEATOU fó hatene ami ona atu muda bero peska sira ba para iha Dolok Oan tanba tasi-ibun Bidau Santa-Ana sei uza ba konstrusaun jardin públiku. Maibé, ami rejeita planu ne’e tanba Dolok Oan dook no la seguru ba ami nia atividade peska,” António dehan ba TATOLI, iha Dili, Kinta (2/9).
Nia hateten katak, maski to’o agora seidauk iha notifikasaun ofisiál kona-ba mudansa ne’e, komunidade peskadór sira preokupa tanba desizaun ne’e bele afeta diretamente sira nia atividade ekonomika no rendimentu família.
António hateten katak maioria peskadór sira hala’o atividade peska iha kalan no dadeer-saan. Tanba ne’e, asesu ne’ebé fasil ba bero peska importante tebes ba sira.
Tuir nia, se bero peska sira tenke para de’it iha Dolok Oan, peskadór sira sei hasoru difikuldade atu asesu ba fatin ne’e no transporta ekipamentu peska.
Nia enfatiza katak komunidade peskadór la kontra planu dezenvolvimentu Governu nian iha tasi-ibun Bidau Santa-Ana. Maibé, nia husu autoridade sira atu konsidera realidade no nesesidade komunidade molok foti desizaun.
“Karik Governu hakarak muda ami nia fatin, tenke prepara fatin ida ne’ebé besik no seguru atu fasilita ami uza ró sira ba kaer ikan. Se hotu-hotu tenke para iha Dolok Oan, sei difisil tebes ba ami atu kontinua hala’o atividade peska loroloron,” nia dehan.
António mós sujere Governu atu buka alternativa seluk ne’ebé la dook husi fatin atuál.
Nia hateten katak medida ne’e importante atu garante kontinuidade atividade peska.
Entretantu, Sekretáriu Estadu Asuntu Toponímia no Organizasaun Urbana, Germano Santa Brites Dias, hateten katak planu atu muda fatin para bero peska husi Bidau Santa-Ana ba Dolok Oan la’ós atu hasai ka prejudika komunidade peskadór.
Nia planu ne’e ho objetivu atu organiza espasu públiku, hadi’a ordenamentu urbanu no garante atividade peska no komérsiu hala’o iha fatin ne’ebé apropriadu.
Germano hateten katak Governu iha responsabilidade atu regula utilizasaun espasu públiku tuir lei no planu dezenvolvimentu urbanu ne’ebé eziste iha kapitál Dili.
“Dolok Oan konsidera nu’udar fatin ida ne’ebé iha poténsia atu akomoda atividade peska no komérsiu peskadór sira ho di’ak liu, tanba área ne’e tau ona iha planu infraestrutura no ordenamentu urbanu ne’ebé Governu prepara,” Germano dehan.
Nia mós garante katak SEATOU sei halo diálogu no koordenasaun ho autoridade lokál, no reprezentante peskadór sira iha fulan Setembru nia laran.
Tuir Germano, diálogu ne’e sei buka solusaun ne’ebé bele responde ba nesesidade komunidade no, iha tempu hanesan, permite Governu kontinua implementa planu dezenvolvimentu urbanu iha área tasi-ibun.
“Governu hakarak asegura katak peskadór sira bele kontinua hala’o sira nia atividade ekonomika no sustenta família. Tanba ne’e, ami husu komunidade peskadór sira atu koopera ho Governu no partisipa iha prosesu konsultasaun ne’ebé sei realiza iha tempu badak,” nia dehan.
Nia hateten katak konsultasaun sei buka solusaun ne’ebé respeita interese komunidade no objetivu dezenvolvimentu kapitál Dili.
Komunidade peskadór Bidau Santa-Ana ne’ebé hamutuk besik na’in 50 hein katak prosesu konsultasaun ne’e sei hala’o ho transparente no inkluziva.
Komunidade mós espera katak planu dezenvolvimentu urbanu iha área ne’e bele lao hamutuk ho interese no bem-estar komunidade lokál ne’ebé depende diretamente ba atividade peska.
Jornalista: Camilio de Sousa
Editór: Filomeno Martins
