SEKoop-Autoridade Vikeke kolleta haree ektare 13 iha Uatulari
VIKEKE, 03 Setembru 2026 (TATOLI)—Sekretáriu Estadu Kooperativa (SEKoop), Arsénio Pereira, hamutuk ho Autoridade Munisípiu Vikeke, Kinta ne’e, kolleta hare variedade mean ektre 13 lokaliza iha área Sukaer, Suku Matahoi, Postu Administrativu Uatulari, Munisípiu Vikeke.
Iha serimónia kolleta ne’e, Arsénio Pereira haktuir, Kooperativa Produsaun Hakbi’it Família (C-PHF) ne’ebé hetan pose iha fulan Fevereiru 2026, maibé halo sira-nia produsaun hare hodi reforsa rendimentu ba kooperativa nian.
“Ita haree Uatulari ne’e poténsia tebes ba setór agrikultura liuliu hare. Ida-ne’e bele sai fonte rendimentu hodi halakon ita-nia ki’ak no mukit iha ita-nia rai,” Governante Arsénio Pereira hateten iha serimónia kolleta hare, iha Postu Uatulari, Kinta ne’e.
Governante ne’e enkoraja membru K-PHF sira atu la’o bá-oin hodi halo produsaun sira seluk hanesan haki’ak animál no kuda modo hodi reforsa ekonomia kooperativa.
Aleinde, Arsénio dehan, SEKoop apoia mákina sama hare ida ba C-PHF nu’udar prémiu ida ba kooperativa ida-ne’e tanba inísiu sira hetan pose sira prodús kedas hare.
Iha fatin hanesan, Reprezenta Prezidente Autoridade Munisípiu Vikeke, atuál Administradór Postu Uatulari, Jorge Ribeiro, hato’o agradesimentu ba Sekretáriu Estadu Kooperativa ne’ebé hakat mai Postu Uatulari hodi kolleta hare C-PHF no inagurasaun sede C-PHF nian.
“Ha’u hato’oagradese tebes ba Sekretáru Estadu Arsénio ne’ebé ohin bele mai Postu Uatulari hodi kolleta hare no inaugura sede C-PHF nian hodi rai sira-nia produtu sira-ne’ebé sira prodús rasik. Ho prezensa ne’e apoia tan mákína sama hare hodi reforsa tan sira,” nia subliña.
Iha biban ne’e, Vise Prezidente C-PHF, João Pinto, informa katak realizasaun kolleta hare ne’e hetan suporta husi Food Agriculture Organization (FAO) mak tulun fasilidade agríkola, hand tratór ki’ik ida no makína sama hare ida, hodi implementa iha natar ektare 13 ékpoka 2026.
“Iha inísiu transforma an sai kooperativa, halo kedas natar purvolta ektare 13, depoiz natar sira-ne’e la’o tiha, estrutura sira hanoin tan katak produsaun iha tinan ida-ne’e, rezultadu ita ba rai ne’ebé, entaun estrutura deside konstrui sede hodi rai produtu,” nia haktuir.
João Pinto hateten orsamentu hodi konstrui sede maihusi kontribuisaun membru sira-nian, iha-ne’ebé konstrusaun hahú iha fulan-Juñu liubá no ramata iha fulan-Agost. Sede medida 6×7, gastu orsamentu $2000,00 resin.
Tuir dadus, membru C-PHF hamutuk na’in-46 ne’ebé daudaun ne’e ativu iha kooperativa.
Entretantu, partisipa iha kolleta hare no inaugura sede kompostu husi reprezentant FAO, IADE, autoridade lokál, funsionáriu kooperativa, Diretór Ensinu Sekundáriu Tékniku Vokasionál Kalo Heda Uatulari no grupu agrikultór sira.
Jornalista: Vitorino Lopes da Costa
Editór: Xisto Freitas da Piedade
