APC Baukau husu komunidade evita sunu rai

BAUKAU, 04 Setembru 2026 (TATOLI)–Autoridade Protesaun Sivíl (APC-sigla portugeza) Munisípiu Baukau husu komunidade atu evita sunu rai iha tempu bailoron nune’e labele hamosu dezastre naturál.

Komandante operasaun APC Baukau, Francisco Viana Freitas, esplika situsaun sunu rai iha tempu bailoron iha Baukau sempre akontense kada tinan iha-ne’ebé kuaze hamosu dezastre naturál mezmu tinan-ne’e parte autoridade seidauk rejista inséndiu ruma.

“Husu komunidade hotu evita labele sunu rai tanba anin boot bele hamosu inséndiu,” Komandante Operasaun APC Baukau informa iha ninia kna’ar fatin, Vila Antiga, Baukau, Sesta ne’e.

Viana relata tempu bailoron kuaze fulan-tolu ona mosu ahi han duut ne’ebé parte APC diretamente halo prevensaun hanesan akontese iha Suku Laisorai, Postu Matebian no Suku Tirilolo,  Samalari Builai no Baukau Vila.

Francisco haktuir sunu rai mosu tanba komunidade barak sei utiliza sistema tradisionál bainhira halo toos, iha-ne’ebé bainhira anin boot bele hamosu inséndiu.

“Komunidade sei falta konxiénsia. Ita kontinua halo sosializasaun, sensibiliizasaun no prevensaun ba kada postu no suku,” Viana akresenta.

Entretantu, APC Munisípiu Baukau rasik rekoñese sei menus rekursu tantu rekursu umanu no ekipamentu nune’e bainhira mosu inséndiu ho ahi alastra maka’as liuliu ho distánsia kilómetru lima.

Jornalista: Natalino Belo 

Editór: Xisto Freitas da Piedade