Delegasaun investidór Índia esplora oportunidade investimentu iha Timor-Leste
DILI, 04 Setembru 2026 (TATOLI)–Delegasaun Investidór sira husi Índia, hamutuk ho Embaixadór Timor-Leste ba Índia, Karlito Nunes, vizita Timor-Leste atu esplora oportunidade investimentu, liuliu kona-ba ambiente no ekosistema investimentu iha Timor-Leste.
Objetivu prinsipál husi vizita delegasaun ne’e atu haree no esplora oportunidade investimentu iha Timor-Leste, inklui ambiente no ekosistema investimentu ne’ebé eziste iha Timor-Leste.
Embaixadór Timor-Leste iha Índia hateten objetivu seluk mak atu halo ligasaun no hasoru diretamente ho kompañia lokál.
Tuir nia, delegasaun ne’e konsege ona hala’o enkontru ho kompañia nasionál sira no iha planu atu asina akordu kooperasaun, inklui Memorandu Entendimentu (MoU-sigla ingleza).
“Semana oin ne’e, iha ona MoU rua ho Star Kin Medical Center, ne’ebé sai hanesan Ospitál privadu primeiru iha Timor-Leste. Depoiz, iha mós MoU ida ho konsórsiu kompañia balun ne’ebé envolve ona iha inísiu vizita delegasaun Índia,” Embaixadór Carlito Nunes tenik ba jornalista iha Palásiu Governu Sesta ne’e.
Embaixadór Karlito informa prosesu esplorasaun oportunidade investimentu sei kontinua, no delegasaun investidór sira sei filafali mai Timor-Leste iha Fulan-Dezembru atu kontinua diskusaun no haree oportunidade investimentu sira.
Nia hatutan investidór sira husi Índia iha interese atu investe iha Timor-Leste tanba sira iha kapitál atu investe, ho prinsípiu atu halo joint venture ka parseria ho kompañia nasionál.
Setór sira-ne’ebé investidór sira iha interese kompostu husi turizmu, agrikultura, mineiru, edukasaun no saúde, no sira mós la taka posibilidade atu espande investimentu ba setór sira seluk.
Iha sorumutu ho delegasaun investidor sira, Vise Primeiru-Ministru no Ministru Koordenadór Asuntu Sosiál, Mariano Assanami Sabino, apresia ba inisiativa investidór ne’ebé sira rasik iha interese atu mai investe iha Timor-Leste. Investidór sira mai ho proposta investimentu iha área oioin, ne’ebé Governu sei diskute no sei haree no hili tuir área espesífika ne’ebé bele kontribui ba dezenvolvimentu nasionál.
“Vise primeiru Ministru sente onradu no fó benvindu ba investidór sira tanba sira iha inisiativa rasik atu mai halo investimentu no kontribui ba dezenvolvimentu iha setór oioin. Investidór sira-ne’e mai ho proposta investimentu oioin, no ita bele hili área ida-ne’ebé ita hakarak sira investe,” Karlito tenik.
Jornalista: Osória Marques
Editór: Xisto Freitas da Piedade
