Labarik ida hetan kanek hafoin asu tata iha Alawa Kraik
BAUKAU, 04 Setembru 2026 (TATOLI)–Labarik feto ho inisiál MMA, tinan-rua, hetan kanek iha parte rentos no kakorok tanba asu tata iha Aldeia Né-olidae, Suku Alawa Kraik, Postu Administrativu Baguia, Munisípiu Baukau, Sesta ne’e.
Xefe Suku Alawa Kraik, João Baptista Alves, esplika kazu referidu akontese iha dadeersan tuku 10:00 Otl, iha-ne’ebé asu ne’ebé haki’ak iha uma tata labarik obrigadu tenke transporta ba Sentru Saúde Baguia hodi hetan tratamentu tanba rezulta rentos no kakorok kanek.
“Asu ne’e la’ós ema seluk nian. Sira-nian duni. Asu ne’e tata iha nia kakorok, rentos no hasan, to’o nakles,” João Baptista hateten iha Sentru Konvensaun Baukau (CCB-sigla portugeza), Vila Antiga, Sesta ne’e.
Líder suku ne’e relata vítima hetan ona asisténsia médika husi pesoál saúde ho emerjénsia tanba fatin kanek suku pontu tolu no hasan suku pontu haat no agora iha faze rekuperasaun.
Aleinde ne’e, mezmu seidauk halo diagnóstika, asu referidu suspeitadu virus raiva tanba iha Postu Baguia hahú rejista ona kazu raiva ne’ebé tuir dadus husi Baukau Zero ba Moras Raiva (BAZERA) hamutuk kazu 15.
“Ami fó ona informasaun ba munisípiu oinsá mak bele enkamiña ba veterinária atu sira bá hasai amostra asu nian,” nia hateten.
Tuir dadus, totál kazu raiva iha Munisípiu Baukau hamutuk 742 kompostu husi mane hamutuk 399 no feto 343, mate na’in-haat no kazu suspeitu na’in-ida.
Jornalista: Natalino Belo
Editór: Xisto Freitas da Piedade
