Prezidente Ramos-Horta partisipa eventu Horasis Visionary Circle 2026 iha Singapura
DILI, 04 Setembru 2026 (TATOLI)–Prezidente Repúblika, José Ramos-Horta, sei partisipa no ko’alia iha eventu Horasis Visionary Circle 2026 iha Singapura hahú husi loron 04 to’o 06 setembru 2026.
Eventu ne’e organiza husi Vickers Venture Partners no halibur hamutuk emprezáriu sira no líder emprezariál ho influénsia globál atu diskute kona-ba lideransa, responsabilidade no vizaun ba tempu naruk iha mundu ne’ebé la seguru.
Eventu ne’ebé foti tema “Lidera Liu husi Inserteza” ne’e, foku liu ba diskusaun sira sei foku ba oinsá tensaun jeopolítika, volatilidade ekonómika no aselerasaun teknolojia afeta lideransa iha negósiu, governu no sosiedade.
Partisipante sira sei fahe ideia kona-ba oinsá lider sira bele mantein kredibilidade no foti desizaun iha tempu ne’ebé laiha presedente klaru.
Tuir planu, Prezidente Ramos-Horta sei partisipa iha konversa espesiál iha loron 04 Setembru ne’ebé prezide husi Baron Woolley husi Woodford, Membru Câmara dos Lordes Reinu Unidu.
Iha okaziaun ne’e, Ramos-Horta sei reflete kona-ba lideransa iha tempu inserteza no Timor-Leste nia futuru ekonómiku.
“Iha mundu ida-ne’ebé define husi mudansa lalais no serteza sira-ne’ebé fraturadu, lideransa tenke ankorada iha vizaun no pragmatizmu. Timor-Leste hamriik iha kruzamentu úniku ida la’ós de’it hanesan nasaun joven ida-ne’ebé konsolida nia demokrasia, maibé hanesan ponte potensiál ida entre dinamizmu husi Sudeste Aziátiku no potensiál boot husi Pasífiku,” Prezidente Ramos-Horta hateten iha nota ne’ebé TATOLI asesu husi Palásiu Prezidensiál.
Nia mós sei ko’alia kona-ba oinsá Timor-Leste bele koloka an nu’udar odamatan entre Sudeste Aziátiku no Pasífiku, oportunidade investimentu iha enerjia, turizmu no dezenvolvimentu sustentável, no oinsá parseria globál sira bele apoia prosperidade ba tempu naruk.
Durante loron tolu (3), tópiku xave sira-ne’ebé sei diskute inklui: lidera iha inserteza, Singapura nia papél globál, perspetiva ekonómika globál, rikusoin no responsabilidade, governasaun AI, no ajenda diversifikasaun Timor-Leste nian.
Prezidente Ramos-Horta nia partisipasaun hatudu Timor-Leste nia kompromisu ba dezenvolvimentu sustentável, konetividade rejionál no kooperasaun globál bainhira nasaun kontinua diversifika nia ekonomia liu mina no gás ba futuru ida ne’ebé reziliente no inkluzivu.
“Ha’u hein atu envolve iha Horasis Visionary Circle hodi diskute oinsá ita bele transforma dezafiu hirak-ne’e sai oportunidade sira ba prosperidade no reziliénsia komun,” nia dehan.
TATOLI
