PD realiza konferénsia hili estrutura foun ba Órgaun Autónomu Munisipíu Dili
DILI, 05 Setembru 2026 (TATOLI)–Partidu Demokrátiku (PD) iha Sábadu ne’e realiza konferénsia hodi hili estrutura foun ba Órgaun Autónomu tolu kompostu husi Organizasaun Muller Demokrátika (OMD), Organizasaun Juventude Demokrátiku (OJD) no Movimentu Profisionál Demokrátiku (MPD) husi Munisípiu Dili ho tema “Hametin estrutura haforsa lideransa”.
Objetivu husi konferénsia ida-ne’e la’ós atu hatuun malu maibé atu buka lideransa organizasaun OMD, OJD no MPD iha Partidu Polítiku (PD) nian.
Prezidente Partidu Demokrátiku, Mariano Assanami Sabino, hateten konferénsia ida-ne’e atu hametin liután koordenasaun amizade iha estrutura órgaun autónomu, tanba konferénsia ne’e la’ós de’it atu halo kompetisaun.
“Entaun, ohin loron ita atu hili lideransa ne’ebé iha poténsia di’ak ba órgaun autónomu idaidak. Konferénsia ne’e la’ós atu hafahe. Kompetisaun hotu tenke rekonsilia kedas hodi sai fali forsa ida de’it ne’ebé sei reprezenta Munisípiu Dili,” Prezidente PD ko’alia iha Salaun Laline Larigutu CNE.
Dirijente PD ne’e dehan estrutura órgaun autónomu PD sei esforsu servisu hodi hasoru eleisaun munisipál, prezidensiál no eleisaun parlamentár, entaun PD nia baze tenke iha Dili no Dili tenke forte liu, tanba sira nu’udár partidu ne’ebé diferente ho vizaun ida katak hamriik hodi tutan lutadór sira-nia luta no rai ida-ne’e tenke uza duni rejime demokrátiku.
“Krtéria rejime demokrátiku tenke rasionál, la’ós emosionál. Mídia tenke sai fatin hodi debate, no seluk tan mak laiha ema ida maka monopóliu (arogante) lia loos no transforma sosiedade demokrátiku no sivilizadu,” nia tenik.
Aleinde ne’e, nu’udar mós Sekretáriu Jerál Juventude Demokrátiku (OJD), Feliciano Quintas do Céu, sente orgullu tebes tanba durante tinan 24 ba kotuk difísil tebes atu hetan membru PD nian, maibé ohin loron ema liuliu joven barak mk entusiazmu no voluntariamente hodi envolve-an iha partidu ida-ne’e.
“Ema hotu hakarak PD sai hanesan partidu ne’ebé iha domin no tane aas ba dezenvolvimentu nasionál rai ida-ne’e. Nune’e, ho kontribuisaun husi juventude demokrátiku nian maka partidu PD nafatin eziste to’o ohin loron hodi kontinua hala’o ninia misaun ho kualidade no iha prontidaun atu serbí rai ida-ne’e,” dirijente OJD ne’e subliña.
Tamba ne’e, nia dehan, ohin sira halibur malu iha-ne’e hodi hili líder órgaun autónomu sira-ne’ebé iha vizaun integridade, lidera ho responsabilidade ba idaidak nia organizasaun autónomu partidáriu nian iha Munisípiu Dili atu kontibui votu no iha esperansa manán eleisaun 2028.
“Husu ba líder foun Órgaun Autónomu nian tenke hatudu imi-nia responsabilidade, kontinua hala’o ninia vizaun no labele konsidera ema foun ka tuan iha partidu tanba PD ita hotu nian,” nia tenik.
Iha parte seluk, Prezidente Organizasaun Muller Demokrátiku, Elvina Sousa, hateten prezensa husi kongresista sira iha fatin ida-ne’e marka espasu liuliu OMD ne’e sai hanesan liras ba PD hodi halibur feto maluk sira atu servisu no haboot PD.
“Prezensa feto iha PD sai hanesan katalisadór no meiu ida atu hariku demokrasia iha partidu nia laran. Tanba ezisténsia demokrasia presiza mós envolvimentu husi feto,” nia afirma.
Tanba ne’e, Elvina esplika, PD sensivel tebes ba promosaun igualdade jéneru iha Timor-Leste, ho nune’e mak PD harii OMD hodi kontribui másimu bá dezenvolvimentu nasionál.
Rezultadu votasaun
Entretantu, rezultadu husi votasaun ba OMD Dili manán husi Pakote A, kompostu husi Prezidente OMD maka Fátima Bento Pereira no ninia Sekretária OMD maka Anabela Fátima da Cruz, ho totál votu 65 no nulu 1.
Rezultadu husi votasaun ba Órgaun Autónomu MPD Dili manán husi Pakote B, kompostu husi Prezidente MPD Dili mak Modesto Lopes ho ninia Sekretáriu MPD maka Aquino Alves, ho totál votu 63.
Votasaun ba Órgaun OJD Dili ne’e pakote úniku, tanba pakote ida seluk ne’ebé kompete la prenxe rekizitu partidu nian, nune’e konsidera pakote úniku entaun ninia líder ka Prezidente OJD Dili maka José Manuel Fátima de Jesus no Sekretáriu OJD Dili maka Jenito Jordão.
Jornalista: Alexandra da Costa
Editór: Xisto Freitas da Piedade
