Kazu Scamming Call Center Kolmera, Tribunál aplika kauzaun $4000 ba arguidu na’in-neen
DILI, 05 Setembru 2026 (TATOLI)–Tribunál Judisiál Primeira Instánsia Dili (TJPD), Sábádu ne’e, liuhusi Juiza Turnu Julmiaty Freitas, hasai despaisu hodi aplika medida koasaun rua ba arguidu kazu Scamming Call Center ne’ebé ekipa Diresaun Servisu Investigasaun Kriminál hamutuk ho Servisu Informasaun Polísia asegura no detein iha área Kolmera, Kinta (03/9).
Arguidu sira-ne’e ekipa konjunta detein liuhusi operasaun ne’ebé ekipa halo iha área Kolmera tanba ho fraglante delitu pratika ba krime Scamming Call Center, nune’e ekipa asegura no detein iha nu’udár detidu ba kazu referida iha durante oras 72.
Iha interrogatóriu dahuluk ne’e, Ministeriu Públiku ne’ebé reprezenta husi Prokuradór Rafael Gusmão promove arguidu na’in-neen ho krime burla informátika, esplorasaun jogu ilísitu, Asosiasaun Kriminozu no Brankeamentu Kapitál.
Durante iha prosesu interrogatóriu dahuluk ne’e, iha alegasaun husi Ministériu Públiku, Prokuradór Rafael Gusmão, solisita Tribunál atu aplika medida koasaun Proibisaun Aujénsia hodi arguidu sira-nia pasaporte, mak la autoriza arguidu sira sai husi territóriu nasionál no kuandu muda fatin tenke informa ba Ministériu Públiku.
Ministériu Públiku mós iha nia alegasaun solisita ba Tribunál atu aplika kauzaun ho valór $5000, nune’e kada arguidu iha obrigasaun selu volór kauzaun $500.
Maibé, parte defeza arguidu sira-nian, Advogadu Privadu Eusébio Xavier husu ba Tribunál atu Medida Kauzaun menus husi $5000, tanba arguidu sira mós presiza buka osan hodi sustenta ba sira-nia moris.
Hafoin rona tiha parte hotu, Juiza Julmiaty Freitas deside hodi aplika medida koasaun Proibisaun Aujénsia ba arguidu sira no aplika medida kauzaun ho valór kuantia $4000 ba arguidu sira.
Nune’e, arguidu sira iha obrigasaun kada ema selu valór osan kausaun rihun $4.
Tribunál nia despaisu ne’e mós fundamenta katak kuandu arguidu sira tenke selu valór kauzaun rihun $4 ne’e iha prazu loron sanulu (10) nia laran.
Kuandu la selu tuir prazu ne’ebé Tribunál konsta ona iha despaisu, mak arguidu sira tenke simu konsekuénsia krime seluk.
Jornalista: Natalino Costa
Editór: Xisto Freitas da Piedade
