Kandidatu vaga rekrutamentu Juis Supremu Tribunál no Tribunál Rekursu sei tuir teste iha loron 18 setembru

DILI, 07 Setembru 2026 (TATOLI) — Kandidatu sira ne’ebé admitidu ba vaga rekrutamentu Juis Supremu Tribunál Justisa (STJ) no Tribunál Rekursu sei sei tuir teste iha loron 18 to’o 21 fulan setembru tinan 2026.

“Supremu Tribunál ne’e ha’u hanoin ne’e dia 21 maiu hatudu ona ba públiku katak Tribunál ninia edifísiu iha ona. Agora ita-nia Juis sira iha dia 18 to’o 21 setembru agora juis sira teste atubele halo avaliasaun ba sira, sé mak pasa sei ba tuur iha Supremu Tribunál,” Afonso Carmona hateten ba jornalista sira iha Tasi-Tolu, segunda ne’e.

Prezidente Tribunál Rekursu ne’e dehan, teste iha juis sira ne’ebé atu tuur iha Supremu no Tribunál Rekursu ne’e sei la’o rigór no transparente tanba matéria hotu-hotu ho lian portugés.

“Sira uza lian portugés. Bainhira sira (juri) fó teste enkamiña rezultadu ba Komisaun Rekrutamentu no Komisaun, fó ba Konsellu Superiór Majistratura Judisiáriu depois iha-ne’ebá mak konsellu sira sei termina sé mak pasa ba Supremu no Tribunál Rekursu. Ha’u hanoin Novembru hanesan ne’e mak sé karik Prezidente Repúblika halo tomada pose ba sira. Kuandu labele ona, entaun bele akontese iha finál tinan 2026, nune’e Supremu Tribunál bele la’o,” nia esplika.

Nia hatutan, Komisaun Rekrutamentu Juis Supremu Tribunál haruka karta ba Prezidente Tribunál Rekursu atu autoriza fatin ba juri sira ne’ebé atu fó teste ba kandidatu Supremu Tribunál no Tribunál Rekursu nian.

Nia hatutan, Komisaun mós husu atu prepara ona Juis na’in hitu ne’ebé sei ba tuur iha Supremu Tribunál Justisa nian fatin, kuandu prosesu teste termina ona katak sé sé mak tuur iha Juis Supremu, na’in hitu simu pose sira bele halo ona servisu

“Ohin sira haruka haree fatin iha terenu halo gabinete ba Juis Supremu nain hitu ne’e no fatin ba Juri sira ne’ebé mak iha tempu badak sei too mai,” nia tenik.

Nia dehan, kona-ba estabelesimentu Supremu Tribunál Justisa buat hotu la’o di’ak, tanba ne’e Nuno Governu nian programa, oinsá atu apoiu osan maibé buat hotu tenke la’o.

“Ha’u-nia esperansa Supremu Tribunál nia tenke ser hamriik duni interese povu nian. Ha’u laiha interese. Ha’u interese mak Supremu Tribunál tenke hamriik ba povu, liuliu fó buat ida justisa ba povu. Ha’u-nia interese mak nia hamriik fó justisa ba povu ida-ne’e ho justu,” nia subliña.

Nia dehan, iha kestaun justisa ne’e buat tolu mak sai xave ba ita, ida seguransa jurídika, justu no utilidade.

“Tribunál tenke hamriik ba povu, liuliu fó buat ida justisa ba povu,” nia afirma.

Entretantu kandidatu ba vaga rekrutamentu ba Juis Supremu Tribunál ne’ebé Tatoli asesu mak hanesan; Juíz Afonso Carmona, Juíza Albertina da Conceição das Neves, Ana Paula Fonseca Monteiro de Jesus, António Hélder Viana do Carmo, António José Fonseca Monteiro de Jesus, Argentino Luisa Nunes, Deolindo dos Santos, Duarte Tilman Soares, Edite Palmira dos Reis.

Nune’e mós Juíza Ersília de Jesus, Juisa Florencia Freitas Soares, Juíza Francisca Marques Cabral, Hugo da Cruz Pui, Ivan José Suritay Patrocinio Antonino, Jacinta Correia da Costa, João Ribeiro, José António de Jesus Escurial da Silva Faria, José Maria de Araújo, Juis José Quintão Soares Celestino, Juíza Jumiaty Maria Freitas, Maria Modesta de Almeida Vieira, Maria Natércia Gusmão Pereira, Maria Solana da Conceição Soares Fernandes, Samuel da Costa Pacheco, Sibruana da Costa, Zulmira Auxiliadora Barros da Silva. Husi parte Defensora Públiku Jerál Câncio Xavier.

Prokuradór Adérito António Pinto Tilman, Prokuradora Angelina Joanina Saldanha, Matias Soares, Vicente Fernandes e Brito.

Sidadaun ne’ebé konkorre iha vaga ne’e tanba iha koñesimentu área direitu mak hanesan; Bárbara Nazareth Andrade Oliveira, Francisco José Ly de Sousa Assis Nicolau no José Pereira da Conceição

Kandaditu ne’ebé la admitidu vaga ne’e mak Afonso Soares, Alexandre Gentil Corte-Real Araújo, maibé fó prazu loron 15 atu kandidatu na’in-rua halo reklamasaun liga ho rezultadu selesaun dokumentu iha vaga ne’e.

Francisco José Ly Nicolau iha direitu konkorre

Prezidente Tribunál Rekursu fó-sai katak, Francisco José Ly Nicolau iha direitu konkorre vaga Supremu Tribunál.

Iha preukupsaun husi públiku ne’ebé halo postajen iha facebook katak ho Francisco Ly Nicolau ne’ebé tuir vaga rekrutamentu Juis Supremu Tribunál Justisa, Prezidente Repúblika José Ramos Horta sei nomea nia ba Prezidente Supremu Tribunál Justisa.

Ho nune’e, Prezidente Tribunál Rekursu Afonso Carmona afirma ema iha direitu atu konkore vaga rekrutamentu Juis Supremu Tribunál.

“Problema saida, laiha problema, sé mak dehan iha problema. Lae, ne’e ita halo regra hatama formuláriu, agora juri mak termina bele tuir ka lae,” nia hateten.

Nia dehan, sidadaun Timor iha direitu kompete vaga Juis Supremu Tribunál Justisa.

“Labele taka ema-nia direitu, sé mak priense regra tuir, pasa ne’e pasa, ida-ne’e mak justu ne’e. Agora ida ita taka malu ne’e mak problema ne’e, hanesan agora vaga ida-ne’e ita konsidera buat ne’e justu,” nia afirma.

Notísia relevante: Aplikante na’in-66 konkorre ba vaga Juíz STJ no TR

Jornalista: Natalino Costa

Editór: Evaristo Soares Martins