Mini irrigasaun Uaite Uma-Ana-Iku besik konkluidu

BAUKAU, 07 Setembru 2026 (TATOLI)—Prosesu konstrusaun mini Irrigasaun Uaite ne’ebé lokaliza iha Aldeia Uaite, Suku Uma-Ana-Iku, Postu Administrativu Venilale, atualmente iha faze progresu no besik konkuidu.

Xefe Suku Uma-Ana-Iku, Antoninho da Costa Freitas, esplika projetu referidu finansia liuhusi orsamentu Planu Dezenvolvimentu Integradu Munisipál (PDIM) ho distánsia metru 900 ne’ebé oras ne’e atinje ona pursentu 50 ho distánsia metru 600.

“Projetu ida-ne’e nia durasaun fulan tolu, hahú servisu iha loron 18 Jullu. Tuir planu, kontratu sei termina iha loron 31 Dezembru,” Xefe Suku Uma-Ana-Iku hateten iha Vila Antiga, Baukau, Segunda ne’e.

Antoninho Freitas relata projetu ne’e kompaña responsável maioria utiliza traballadór lokál iha-ne’ebé sei konklui tan metru 300 no konsidera durante implementasaun kompaña hatudu responsabilidade liuhusi mobilizasaun materiál konstrusaun ba fatin projetu no hetan kooperasaun di’ak husi autoridade lokál no komunidade.

Alende ne’e, bainhira finaliza mini-irrigasaun Uaite sei fó asesu bee ba natar ektare 60 resin no fó benefísiu direta ba komunidade agrikultór ho totál uma-kain 100-resin ne’ebé depende ba atividade agrikultura.

“Irrigasaun ne’e sei fó asesu bee ba área natar ektare 60 resin no fasilta ona komunidade atu halai natar,” Antoninho akresenta.

Entretantu, projetu konstrusaun mini-irrigasaun Uaite responsabiliza husi Kompañia GINAREDOL’DS UNIP, LDA, liuhusi orsamentu Autoridade Munisípal Baukau ho totál rihun $100-resin.

Jornalista: Natalino Belo 

Editór: Xisto Freitas da Piedade