Ohin, HNVG hahú halo rekrutamentu ba profisionál saúde hamutuk 478
DILI, 07 Setembru 2026 (TATOLI)—Hospitál Nasionál Guido Valadares hahú halo rekrutamentu ba profisionál saúde hamutuk 478 ba públiku, hahú husi 07 to’o 18 Setembru 2026.
Tuir pájina ofisiál Hospitál Nasionál Guido Valadares ne’ebé mak TATOLI asesu katak, totál vaga ne’ebé mak publika husi Hospitál Nasionál Guido hamutuk 478. Husi númeru ne’e, Médiku Jerál Juniór A/1 hamutuk vaga 112, Infermajen Jerál Juniór A/1 hamutuk vaga 236, Infermajen Jerál Juniór B/1 hamutuk vaga 14, Asistente Infermajen Jerál hamutuk vaga 30, Parteira Jerál Junior A/1 hamutuk vaga 25, Parteira Jerál Junior B/1 hamutuk vaga 10.
Tékniku Radiologista, TDTSP Jerál, Juniór A/1 hamutuk vaga 10, Tékniku Analista Laboratório, TDTSP Jerál, Junior A/1 hamutuk vaga haat (4), Tékniku analista Banco de Sangue, TDTSP Jerál, Juniór A/1 hamutuk vaga tolu (3), Tékniku Fisioterapia, TDTSP Jerál, Juniór A/1 hamutuk vaga na’in-rua (2), Tékniku Biomedical, TDTSP Jerál, Juniór A/1 hamutuk vaga tolu (3).
Tékniku Nutrisaun TDTSP Juniór A/1 hamutuk vaga tolu (3), Tékniku Medical Record TDTSP Juniór A/1 hamutuk vaga haat (4), Tékniku Farmásia TDTSP Juniór A/1 hamutuk vaga lima (5), Tékniku Radiologista, TDTSP Jerál, Juniór B/ hamutuk vaga 12, Tékniku Fisioterapia, TDTSP Jerál, Juniór B/1 hamutuk vaga rua (2).
Tékniku Biomedical, TDTSP Jerál, Juniór B/1 hamutuk vaga rua (2), Refkrasionista, TDTSP Jerál, Juniór B/1 hamutuk vaga rua (2), Refkrasionista, TDTSP Jerál, Juniór B/1 hamutuk rua (2), Tékniku Medical Record, TDTSP Jerál, Junior B/1 hamutuk rua (2), Tékniku Farmacia TDTSP Jerál, Juniór B/1 hamutuk tolu (3), Asistente TDTSP hamutuk vaga rua (2).
Entretantu, vaga refere submete aplikasaun hahú husi loron Segunda (07 Setembru 2026) to’o Sesta (18 Setembro 2026), tuir oras servisu, fatin iha ospitál António Carvalho Lahane.
Kritéria ba vaga refere mak hanesan Médiku Jerál ne’e uza map kór verde, Infermajen ne’e uza map Kór azúl, Parteira uza map kór Mean, Tekniku Aliadus /TDTSP uza map kór Kinur, Asistente Enfarmajen ne’e uza map Kór de Laranja (Orange), Asistente TDTSP uza map Kór Chocolate.
Antes ne’e, Diretór Servisu Apoiu Diagnóstiku Terapeutiku iha HNGV, Vidal de Jesus Lopes, hateten kona-ba prosesu rekrutamentu sei anúnsiadu ba públiku iha semana oin, tanba rekrutamentu esforsu husi Hospoitál Nasionál Guido Valadares atu reforsa rekursu umanu no hadi’a kualidade servisu saúde ba komunidade.
“Atu informa ba públiku katak ospitál nasionál prevee orsamentu ba rekrutamentu ba tinan ida ne’e, rekrutamentu ba funsionáriu sira-ne’e kompostu husi médiku, parteira, infermeiru, tékniku aliadu no asisténsia infermeiru maibé orsamentu ba rekrutamentu ha’u labele mensiona enprinsipiu ami prevee ona,” Diretor Servisu Apoiu Diagnóstiku Terapeutiku iha HNGV, Vidal de Jesus Lopes, hateten ba jornalista sira iha nian kna’ar fatin, tersa (18/08).
Nia dehan, tanba prosesu rekrutamentu ne’e Administrativa entre Hospitál Nasionál Guido Valadares, Ministériu Saúde nomós Komisaun Funsaun Públiku.
“Prosesu administrativu entre HNGV, MS ho KFP, tentativa semana oin ami sei taka sai vaga rekrutamentu ba públiku, para aplikante sira mai konkore ba vaga ne’e, rekrutamentu por volta 400 pesoa, orsida taka sai imi bele asesu,” nia dahan.
Nia haktuir, informasaun ne’ebé disponivél, detallu kona-ba katégoria vaga, ka kritériu kandidatura, dokumentu ne’ebé presiza, tuir prazu entrega no prosedimentu selesaun sei hatudu iha anúnsiu ofisiál bainhira vaga sira publika.
“HNGV hein katak oportunidade rekrutamentu ne’e bele fó espasu ba ema barak liuliu ba profisionál no kandidatu sira-ne’ebé iha kualifikasaun atu kontribui ba servisu saúde nasional. Ne’ebé, husu kandidatu sira interese tenke akompaña komunikasaun ofisiál HNGV atu hetan informasaun kompletu kona-ba vaga 400 ne’e no evita depende ba informasaun ne’ebé la’ós fonte ofisiál,” nia konklui.
Jornalista : Felicidade Ximenes
Editór : Cancio Ximenes
