Ramos-Horta kondekora dirijente OMS na’in-rua ho Grau Kolár Orden TL
DILI, 07 Setembru 2026 (TATOLI)–Xefe Estadu José Ramos-Horta kondekora Grau Kolár Orden Timor-Leste ba dirijente Organizasaun Mundiál Saúde (OMS), na’in- rua iha jantar gala iha Palásiu Nobre Lahane, Segunda (07/09).
Serimónia ne’e hala’o nu’udar parte husi sesaun Komité Rejionál OMS ba da-79.
Tuir Dekretu Prezidente Repúblika No.102/2026, Xefe Estadu kondekora Grau Kolár ba Eis Diretór Rejionál OMS ba Sudeste Aziátiku, Poonam Khetrapal Singh.
Rekoñesimentu ne’e tanba ninia kontribuisaun ba promosaun kobertura saúde universál, prevensaun moras no hasa’e kooperasaun ho Timor-Leste.
Tuir Dekretu Prezidente Repúblika Nú. 103/2026, Xefe Estadu mós kondekora Grau Kolár ba Diretór-Jerál OMS, Tedros Adhanom Ghebreyesus.
Rekoñesimentu ne’e ba ninia lideransa iha promove saúde globál, responde ba emerjénsia saúde públika, no hametin sistema saúde iha mundu, inklui Timor-Leste.
“Timor-Leste sente onradu hodi konfere ba ita ho Grau Kolár. Ami-nia sidadaun barak mak hetan benefísiu husi serbisu ne’e, Ramos-Horta hateten iha nia diskursu.
Xefe Estadu hateten serimónia ne’e subliña Timor-Leste nia kompromisu ba parseria globál iha setór saúde.
Nia espresa esperansa katak onra ne’e sei inspira kooperasaun internasionál hodi harii mundu ida ne’ebé saudavel no ekuitativu ba ema hotu.
Jornalista : Hortêncio Sanchez
Editór : Cancio Ximenes
