Ramos-Horta no Ministru Saúde Indonézia diskute kona-ba saúde no ASEAN

DILI, 07 Setembru 2026 (TATOLI)–Prezidente Republika, José Ramos-Horta, tersa ne’e, iha Palásiu Prezidensiál Prezidente Nicolau Lobato, Bairru Pite, simu vizita husi Ministru Saúde Repúblika Indonézia, Budi Gunadi Sadikin hodi ko’alia kona-ba setór saúde no ASEAN.

Ministru Saúde Repúblika Indonézia, Budi Gunadi Sadikin, hateten ida-ne sai onra ida ba nia atu hasoru Xefe Estadu ne’ebé sai ona belun kle’ur Indonézia nian.

Iha okaziaun ne’e nia hato’o parabéns ba Timor-Leste ba eliminasaun moras trakoma, ne’ebé mak infesaun ba matan kauza husi baktéria Chlamydia trachomatis.

“Ami hakarak hato’o parabéns ba Timor-Leste nia eliminasaun moras trakoma ho susesu. Ida-ne’e asuntu ida. Ida mós ami ko’alia kona-ba kooperasaun ho Timor-Leste atu servisu hamutuk iha área saúde no ami ko’alia mós kona-ba ASEAN nian,” Ministru Saúde ne’e dehan hafoin remata enkontru no Xefe Estadu.

Nia mós hato’o parabéns ba adezaun ofisiál Timor-Leste iha ASEAN no nia informa katak iha semana ne’e sei iha enkontru métrika saúde ASEAN iha Malázia no Timor-Leste sei partisipa kompletu.

“Timor-Leste sei marka prezensa másimu iha enkontru métrika saúde ASEAN nian iha Malázia,” nia afirma.

Iha biban ne’e, Ministru Budi mós informa katak Prezidente Prabowo nomeia ona nia nu’udar kandidatu husi Indonézia ba Organizasaun Mundiál Saúde (OMS).

Nia husu Xefe Estadu nia hanoin no rekomendasaun tanba nia nu’udar lideransa ho esperiénsia iha OMS no ONU.

“Ha’u hakarak husu nia hanoin, nu’udar membru OMS no membru ONU ne’ebé iha esperiénsia maka’as,” nia dehan.

Ministru Saúde ne’e hateten, nia fahe ona istória barak ho Xefe Estadu. Nia fiar katak enkontru ne’e sei fó benefísiu ba hametin relasaun entre nasaun rua iha setór saúde.

Área prioridade sira maka moras hada’et hanesan raiva no gripe ne’ebé presiza abordajen sériu.

Jornalista : Hortêncio Sanchez

Editór        : Cancio Ximenes