TL-Brazíl reforsa kooperasaun iha selebrasaun Independénsia Brazíl ba da-204
DILI, 07 Setembru 2026 (TATOLI)–Prezidente Repúblika, Xefe Estadu José Ramos-Horta hamutuk ho Embaixadór Brazíl mai Timor-Leste, Ricardo José Lustosa Leal, partisipa iha selebrasaun aniversáriu independénsia Repúblika Federativa Brazíl ba da-204 iha Embaixada Brazíl, Faról, Dili, Segunda (07/09).
Iha diskursu, Xefe Estadu elojia reziliénsia no diversidade kulturál nasaun Amérika Súl ne’e nian. Nia destaka mós kna’ar importante Brazíl nian nu’udar lian forte ba nasaun Súl Globál iha fórum internasionál sira hanesan G20 no BRICS.
José Ramos-Horta mós fó importánsia ba momentu istóriku “Gritu Ipiranga” iha tinan 1822, no elojia mós forsa ekonómika modernu no lideransa Brazíl nian iha área ambiente nian.
Nia hateten, relasaun bilaterál entre nasaun rua ne’e dezenvolve kle’an ona hahú husi restaurasaun independénsia Timor-Leste iha tinan 2002 to’o ohin loron.
“Durante dékada rua resin, Brazíl sai ona parseiru ne’ebé laran-luak no metin iha jornada harii-nasaun Timor-Leste nian,” Xefe Estadu hateten iha nia diskursu.
Xefe Estadu subliña katak apoiu Brazíl nian ba Timor-Leste la’o nafatin iha setór oioin liuliu edukasaun, saúde públika no justisa.
Nia espresa otimizmu katak iha futuru sei iha kapítulu foun ba kooperasaun. Ezemplu mak planu konstrusaun ba Embaixada Brazíl no Sentru Kulturál foun iha Timor-Leste.
Xefe Estadu hatutan, kompromisu nasaun rua ne’e nian ba multilateralizmu, asaun ba mudansa klimátika no dezenvolvimentu sustentável.
Nia destaka papel importante Brazíl nian nu’udar anfitriau ba Konferénsia Mundiál ba Klima COP30 ne’ebé sei realiza iha Belém.
Aleinde ne’e, Ramos-Horta fó benvindu ba envolvimentu Brazíl nian ne’ebé aumenta ba rejiaun Sudeste Aziátiku. Nia afirma apoiu forte husi Timor-Leste ba aspirasaun Brazíl nian atu sai Parseiru Diálogu ASEAN nian.
Jornalista : Hortêncio Sanchez
Editór : Cancio Ximenes
