TR prevee millaun $4 konstrui Tribunál Judisiál Primeira Instánsia iha munisípiu neen
DILI, 07 Setembru 2026 (TATOLI) – Tribunál Rekursu lideradu Prezidente Afonso Carmona, prevee millaun $4 liuhusi Orsamentu Jerál Estadu tinan 2026 nian hodi konstrui Tribunál Judisiál Primeira Instánsia iha munisípiu neen.
Nia esplika, agora dadaun Tribunál Rekursu hatuur ona fatuk dahuluk ba konstrusaun futuru instalasaun edifísiu Tribunál Judisiál Primeira Instánsia Vikeke, Baukau, Ermera, Bobonaru no iha tempu badak Suai no Oe-kusi.
“Husi konstrusaun sira-ne’e kada Tribunál Judisiál Primeira iha munisípiu neen ita prevee millaun haat,” Prezidente Tribunál Rekursu Afonso Carmona hateten ba jornalista sira iha Tasi-Tolu, segunda ne’e.
Nia dehan, ba tinan oin Tribunál Rekursu kontinua aposta ba konstrusaun Tribunál Judisiál Primeira Instánsia munisípiu lima ne’ebé seidauk instala.
“Tanba ne’e bazeia ba lei organizasaun judisiál haktuir tenke estabelese Tribunál Judisiál Primeira Instánsia iha munisípiu hotu, tanba ne’e agora ita planu estabelese Tribunál Judisiál Primeira Instánsia neen, ita iha munisípiu sanulu-resin tolu, maibé Dili ita estabelese ona entaun ita tinan oin kontinua prevee osan estabelese Tribunál Judisiál Primeira Instánsia ba munisípiu neen,” nia informa.
“Ne’ebé hanoin ida-ne’e tama iha programa Governu nian, tanba ne’e mak ita hahú halo lansamentu fatuk dahuluk fizikamente agora ita lansa tiha ona,” nia katak.
Jornalista: Natalino Costa
Editór: Evaristo Soares Martins
