Uma-kain 432 iha Aldeia 12 Outubru Comoro sei enfrenta problema bee-moos
DÍLI, 08 Setembru 2026 (TATOLI) – Uma kain 432 iha Aldeia 12 Outubru, Suku Comoro, Postu Administrativu Dom Aleixo, Munisípiu Díli, kontinua enfrenta difikuldade asesu ba bee-moos.
Xefe Suku Comoro, Elígio José da Silva Marçal, hateten katak komunidade iha aldeia ne’e tenke sosa bee husi kareta tanke ba nesesidade loron-loron.
“Ha’u-nia komunidade hamutuk uma-kain 432 iha aldeia 12 Outubro mak seidauk hetan bee-moos,” Elígio hateten ba TATOLI iha Sede Suku Comoro, Dili, ohin.
Nia dehan tanba ne’e, sira tenke sosa bee husi kareta tanke. Bee tanke ida ho kapasidade litru 5,000, folin US$30.
Tuir Elígio, autoridade lokál Suku Comoro submete ona proposta ba Bee Timor-Leste, E.P. (BTL) desde tinan 2025, atu fornese distribuisaun bee-moos ba Aldeia 12 Outubru.
Maibé, nia hateten katak to’o agora autoridade lokál seidauk simu resposta ofisiál husi BTL kona-ba proposta ne’e.
“Ami espera katak BTL bele responde proposta ne’ebé ami submete ona desde tinan 2025,” nia dehan.
Elígio hateten katak komunidade balu mós tenta ona fura bee iha sira nia área hela-fatin. Maibé, bee ne’ebé hetan husi rai mak barak liu masin.
“Bee ne’ebé fura ne’e labele uza atu tein no hemu. Sira uza deit ba fase roupa no ba nesesidade sanitária loron-loron,” nia hatutan.
Nia preokupa katak limitasaun asesu ba bee-moos bele afeta saúde no kondisaun moris komunidade, liuliu labarik no katuas-ferik sira.
Tanba ne’e, Elígio husu Governu no BTL atu fó atensaun ba problema bee-moos iha Aldeia 12 Outubru no buka solusaun ba komunidade.
Nia subliña katak asesu ba bee moos nu’udar nesesidade bázika importante atu garante saúde no bem-estar komunidade.
Jornalista: Camilio de Sousa
Editór: Filomeno Martins
