Xefe Estadu despede Ró Biblioteka iha Portu Dili
DILI, 07 Setembru 2026 (TATOLI)–Xefe Estadu, José Ramos-Horta, segunda ne’e, halo despedida ba Ró Biblioteka internasionál ne’ebé vizita Timor-Leste durante semana tolu iha Timor-Leste.
Ró ne’e ho konseitu úniku iha mundu tanba la’ós ró turista ba pasiar, maibé ró luxu ne’ebé lori biblioteka no faan livru ho diskontu boot.
Xefe Estadu dehan ró ne’e fó oportunidade boot ba labarik Timor-Leste nian ne’ebé dala barak seidauk hetan oportunidade tama ró boot.
“Ha’u kontente tebes tanba sira fó oportunidade ida ba labarik oan sira hetan livru. Labarik oan sira nunka tama ró ida, ida ne’e konseitu ida hanesan úniku iha mundu,” Ramos-Horta hateten ba jornalista sira.
Iha tinan kotu, nia dehan, nia mak konvida ekipa ró ne’e atu mai Timor-Leste iha Agostu 2026, no sira mai duni.
Prezidénsia Repúblika mós sosa livru lubuk ida hodi oferese ba labarik atus ba atus hodi lori ba uma.
Tuir Xefe Estadu, na’in ba ró ne’e mai husi Alemaña. Iha Alemaña mós iha ró hanesan ne’e maibé boot liu dala rua to’o tolu. Ema hotu ne’ebé servisu iha ró laran maioria voluntáriu.
“Sira servisu iha ne’e hotu-hotu voluntáriu, joven sir- ne’e voluntáriu. Ha’u agradese boot ba sira,” nia afirma.
José Ramos-Horta mós agradese ba Kapitaun ne’ebé sidadaun Filipina no Diretora ró ne’e ne’ebé sidadaun Súl Afrika. Ekipa iha ró laran mai husi nasionalidade oioin.
Xefe Estadu esplika livru sira-ne’ebé faan mak kona-ba siénsia, literatura, língua no istória. Ba labarik sira, iha livru barak ho dezeñu, lapis kór no mapa.
“Livru barak liu Inglés, istória baibain, animál, natureza. Ba labarik sira ho dezeñu oioin, lapis kór, mapa buat sira-ne’e,” nia dehan.
Xefe Estadu subliña katak organizasaun lokál sira mós ajuda fasilita vizita ne’e, nune’e labarik sira bele apróveita oportunidade ne’e.
Jornalista : Hortêncio Sanchez
Editór : Cancio Ximenes
