Xefe Estadu garante Kreximentu Ekonómiku 2026 sei to’o 5%
DILI, 07 Setembru 2026 (TATOLI)–Xefe Estadu, José Ramos-Horta, hateten kreximentu ekonómiku Timor-Leste iha tinan 2026 sei to’o 5%, no indikadór sosiál sira seluk mós hatudu rezultadu di’ak.
Ramos-Horta dehan, ema balun buka de’it buat ne’ebé negativu maibé labele haluha dadus sira-ne’ebé pozitivu.
“Ezemplu, kreximentu ekonómiku tinan ida-ne’e sei to’o 5%. Segundu, haree mós ba iha relatóriu ne’e mortalidade infantil tun lubuk ida. Dezempregu tun, inflasaun 0.4%,” Xefe Estadu hateten ba jornalista sira iha Portu Dili, segunda ne’e, bainhira ko’alia kona-ba dezenvolvimentu nasaun nian.
Nia husu públiku atu haree ba obra dezenvolvimentu sira iha Dili laran no iha munisípiu sira ne’ebé emprega timoroan rihun ba rihun.
“Haree servisu bara-barak, obra sira iha Dili laran ne’e sé mak servisu iha ne’eba, rihun ba rihun iha Dili laran. Iha foho, ne’e timoroan mak servisu manan vensimentu, sira servisu la saugate, ne’e mak dezenvolvimentu,” nia dehan.
Xefe Estadu rekoñese katak próblema pobreza sei lori tinan barak atu rezolve. La’ós bele muda iha tinan ida ka tinan rua nia laran.
“Buat pobreza ne’e lori tinan hira tan mak bele rezolve, ne’e la’ós hanesan tanba ohin ka tanba tinan kotuk mai, sei lori tinan lubuk ida,” nia dehan.
Nia subliña katak, dalan atu hamenus pobreza maka liuhusi kria empregu.
Nia fó ezemplu ba prójetu Sentru Konvensaun foun ne’ebé sei harii iha área Portu Dili. Prójetu ne’e bainhira ramata sei fó servisu ba ema lubuk ida, hahú husi fase konstrusaun to’o ba servisu iha edifísiu laran.
“Saida mak atu ajuda pobreza ne’e tun mak empregu. Sentru Konvensaun foun atu halo iha fatin Portu ida-ne’e sei emprega ema lubuk ida. Konvensaun ne’e próntu sei emprega ema lubuk ida servisu iha edifisiu laran, servisu oioin,” nia dehan.
Jornalista : Hortêncio Sanchez
Editór : Cancio Ximenes
