CI realiza serimónia kulturál hodi proteje biodiversidade ba lagoa tolu iha Kovalima

KOVALIMA, 08 Setembru 2026 (TATOLI) – Conservasaun Internasionál (CI) hala’o atividade kulturál iha Munisípiu Kovalima hodi husu lisensa ba katuas no lia-na’in atu proteje no konserva biodiversidade, iha área lagoa tolu ne’ebé sai alvu ba programa konservasaun.

Atividade kulturál ne’e hala’o iha Lagoa hasan Boot, iha Suku Beiseuk, Postu Administrativu Tilomar, Lagoa Hasan Foun, Suku Lalawa, Postu Administrativu Tilomar no Lagoa  Rai Mea, Postu Administrativu Zumalai, iha 2026.

CI observa katak área sira ne’e iha potensial boot ba biodiversidade no rekursu naturál, ne’ebé presiza proteje no konserva atu sai patrimóniu naturál ba jerasaun futuru.

Atividade ne’e envolve katuas, lia-na’in, autoridade lokál no korpu guarda floresta, ho objetivu atu loke dalan ba implementasaun programa proteksaun no konservasaun biodiversidade durante tinan haat.

Programa konservasaun CI nian ne’e tuir prosesu sosializasaun ne’ebé hala’o ona iha fulan Maiu no Juñu 2026. Agora, organizasaun ne’e kontinua ho atividade kkulturál odi hetan lisensa no apoiu husi komunidade lokál antes implementa programa iha área sira ne’ebé determina ona.

Bazeia ba observasaun jornalista iha tereñu, área tarjetu sira iha rekursu naturál renovável no la’ós renovável ne’ebé barak, nune’e presiza esforsu hamutuk husi parte relevante sira atu proteje no konserva rekursu hirak ne’e ba futuru.

Jornalista: Celestina Teles

Editór:Florencio Miranda Ximenes